Украинскиот претседател Володимир Зеленски ја повика меѓународната заедница одлучно да одговори на рускиот напад со новата ракета со среден дострел. „Светот мора да реагира“, апелираше тој во објава на Х.

Зеленски реагираше на изјавата на рускиот претседател Владимир Путин, кој ги употреби новите руски балистички ракети, велејќи дека со тоа е ескалирна ситуацијата во војната во Украина и дека е прекршена Повелбата на ОН.

„Путин денеска призна дека веќе го направил вториот чекор оваа година кон ескалација, кон проширување на оваа војна. Користена е нова балистичка ракета. Путин го погоди нашиот град Днепар, еден од најголемите градови во Украина. Ова е очигледно и сериозно зголемување на обемот и бруталноста на оваа војна, цинично кршење на Повелбата на ОН од страна на Русија“, рече Зеленски за време на неговото вечерно обраќање. 

Тој додаде дека првиот чекор на Русија кон ескалација за една година е вклучувањето на Северна Кореја во војната против Украина, „и тоа со контингент од најмалку 11.000 војници“.

Претходно рускиот претседател Владимир Путин потврди дека Русија истрелала нова балистичка ракета со среден дострел против украинскиот град Днепар и се закани со нови напади.

Како што рече, современите системи немаат начин како да се спротивстават на новата ракета наречена „Орешник“. 

Путин истакна дека ова е одговор на САД и на другите западни земји кои наводно и дозволуваат на Украина да користи оружје со долг дострел за напади врз руска територија. 

Зеленски одговори дека тоа е опфатено со меѓународното право како одбрана од руска агресорска војна. „Нашето право на самоодбрана е исто како и правото на кој било друг народ.“