Сојузното обвинителство во Берлин нареди апсење на осомничен шпион кој наводно работел за Русија. Како што објави највисоката германска институција за кривична правда, тој човек „бил во постојан контакт со руска разузнавачка служба од Германија најдоцна од мај 2025 година“.

Според наводите, државјанинот на Казахстан му доставил на својот офицер за врска, меѓу другото, информации за германската воена помош за Украина, како и за германската индустрија за оружје и одбрана. Поточно, станува збор за компании кои развиваат беспилотни летала и роботи.

Фотографии од Берлин и регрутирање за група за саботажа?

Покрај тоа, осомничениот наводно повеќепати испраќал фотографии од јавни згради во Берлин или воени конвои на автопатишта - вклучувајќи и „конвој на земја од НАТО“. Тој, исто така, наводно го информирал својот контакт во руската разузнавачка служба за соодветни цели за саботажа во Германија и понудил да регрутира луѓе за единица за саботажа и шпионажа.

Осомничениот шпион беше уапсен во Берлин во вторникот од страна на службеници на Сојузната криминалистичка полиција. Денеска, тој треба да биде изведен пред истражниот судија во Сојузниот суд на правдата, кој ќе го информира за налогот за апсење и ќе одлучи за притвор.

Руски шпиони во фокусот на Сојузното обвинителство

Руското шпионирање долго време го преокупира Сојузното обвинителство. Само оваа година, германските власти веќе уапсија повеќе осомничени шпиони. Во јануари, вниманието на јавноста беше насочено кон апсењето на германско-украинска државјанка, која наводно шпионирала за руската разузнавачка служба. Таа наводно собирала информации за учесници во високи политички настани и се распрашувала за локациите на одбранбената индустрија и планираните испораки на дронови во Украина. Притоа, таа се обратила до поранешни вработени во Министерството за одбрана кои ги познавала лично.

Во март, двајца осомничени шпиони беа фатени во Рајнската област (Северна Рајна-Вестфалија) и во шпанската Елда. Според тврдењата, тие следеле човек кој испорачувал беспилотни летала во Украина од Германија во име на руската разузнавачка служба. Според истражителите, тој мониторинг имал за цел да подготви „понатамошни разузнавачки операции против целното лице“. Набргу потоа, во Хаген беше уапсен маж кој наводно шпионирал поранешен борец на украинските вооружени сили во Германија по налог на Русија.

Значително зголемување на руски хибридни напади

Од средината на февруари, канцеларијата на сојузниот обвинител спроведува истрага во врска со фишинг кампања, меѓу другото, против германски политичари преку апликацијата Сигнал. Германската влада се сомнева дека Русија стои зад оваа шпионска активност. Канцеларијата на сојузниот обвинител сè уште не коментираше за можниот главен мотив.

Во меѓувреме, Сојузната канцеларија за заштита на Уставот (БфВ) објави прирачник кој треба да им помогне на граѓаните да препознаат и да се одбранат од хибридни закани. Хибридното војување подразбира комбинација од воени, економски, разузнавачки и пропагандни средства, кои можат да се користат за влијание и врз јавното мислење. Различни земји користат вакви методи против Германија, наведува БфВ. Од почетокот на војната во Украина, забележано е значително зголемување на ваквите активности, особено од страна на Русија, како по обемот, така и по професионализмот.