Повеќе илјади верници годинава ја следеа поворката „Патот на крстот“ околу Колосеумот во Рим, соопшти Ватикан. Патот на крстот е вековна традиција, која низ 14 станици симболично го прикажува патот на страдањето на Исус Христос - од осудата до смртта на крстот.

Молитви за мир

На станиците од Патот на крстот беа читани текстови за медитација, меѓу кои и пораките за мир од двајца млади луѓе од Украина и од Русија. Украинското момче раскажува како поради војната во татковината побегнал во Италија. Во тажните моменти баба му секогаш го тешела: „Ќе видиш, сѐ ќе помине. И со Божја помош повторно ќе дојде мирот“. Руското момче, поради мобилизацијата во неговата земја, морало да се збогува со дедо му, татко му и брат му. Неговата порака гласи: „Исус, те молам, направи го целиот свет мирен и сите да можеме да бидеме браќа и сестри“.

Ватикан со тоа имаше за цел да испрати знак на мир вечерта на Велики петок. Покрај пораките на двете момчиња од Украина и Русија, на другите станици од Патот на крстот во фокус беа бегалците и свештенството од различни региони погодени од војна и страдање. Тие дојдоа од Западна Африка, Југоисточна Азија или Блискиот Исток.

Претходните години папата Францискобеше присутен на станиците на Патот на крстот. Овојпат, поглаварот на Римокатоличката црква одлучи да не учествува. Ватикан објави дека папата нема да го следи Патот на крстот поради „многу студеното време овие денови“. 86-годишникот, како што беше соопштено, ќе се придружи на молитвите од Ватикан. Папата беше пуштен од болница минатата недела по тридневнолекување од бронхитис.

Поглаварот на Рпокатоличката црква ја водеше литургијата на Велики петок во базиликата Свети Петар. На почетокот, папата, кој имаше проблеми со колената, не легна пред олтарот да се помоли, како што тоа обично се случува, туку неколку минути стоеше и тивко се молеше.