Желбата да усреќат некого за празниците, ги собира овие жени на плетење и кафе-муабет.  

Илинка Русевска плете 5 години за хуманитарни цели и вели: 

„Го правам стварно од чиста љубов... Сега плетеме за бездомници, шалчиња, капчиња и ракавици. И многу се радувам за тоа дека ќе израдуваме уште некоја душичка.”  

Оваа акција е инцијатива на Фејсбук-групата „Плетени коцки“ и вклучува жени кои доброволно плетат различни работи за хуманитарни цели.  

Александра Стефановска, основачка на неформалната група „Плетени коцки“, објаснува: 

„Сакаме да подариме малку љубов за нашите сограѓани... Сето ова е рачно изработено и се надевам дека ќе усреќиме и ќе згрееме некого. Не само физички, туку и на душите ќе им биде убаво.“  

Неколку дена подоцна, целта е постигната - плетените работи им се делат на оние на кои им се наменети. Бранко Петревски, кој има неподвижна жена, покрај другото, дошол да земе и плетен шал за неа: „Собата баш не ми е топла, ќе си го врзе ова на чело, а ракавиците претежно ги земав за мене.”  

„Плетени коцки“ зад себе има разни успешни акции за социјално загрозени лица. Во земјата нема актуелни официјални бројки за сиромаштија. Според последните податоци од Државниот завод за статистика од 2020 година, сиромашни биле 21,8% од населението.