По нападот на индиската армија врз неколку цели во Пакистан, ситуацијата на потконтинентот продолжува опасно да се заострува. Пакистанскиот премиер Шехбаз Шариф по состанокот на кабинетот за безбедност во Исламабад, повторно изјави дека ќе следи реакција на индиската воена акција. Според соопштението, Шариф изјавил дека Пакистан го задржува правото да одговори во самоодбрана во време, место и на начин по свој избор. „Пакистанските вооружени сили се прописно овластени да преземат соодветни мерки“, додаде тој, без да даде детали. Меѓународната заедница е сè повеќе загрижена поради натамошната ескалација на конфликтот, а новиот германски канцелар, Фридрих Мерц, ги повика страните во конфликтот да „останат смирени“.

Според наводите на пакистанската војска, во последните ракетни напади загинале 31 лице, а 57 се повредени. Причината за зголемувањето на бројот на жртви е „кршење на прекинот на огнот“ од страна на индиската армија по должина на граничната линија, се вели во соопштението. Утринава, пакистанската новинска агенција Гео ТВ објави дека во раните утрински часови во источниот пакистански град Лахор се случила експлозија. Детални информации засега не се познати. 

Жртви и во Индија

Инаку индиската власти утринава соопшти дека 13 цивили загинале од пакистански оган во „прекршувања на примирјето“ долж нивната де факто граница од средата наваму. 

Индиското Министерство за надворешни работи соопшти дека сите загинати биле од градот Пунч, а уште 59 биле повредени, од кои повеќето исто така во градот.

Индиската армија исто така соопшти дека војник загинал во Пунч во средата „за време на гранатирање од страна на пакистанската армија“, со што вкупниот потврден број на загинати на индиска страна се искачи на 14.

Ескалација по терористичкиот напад во Кашмир

Индија, според сопствените тврдења, во средата вечер нападнала повеќе цели во Пакистан и во делот од Кашмир контролиран од Пакистан. Нападите биле насочени кон „терористичка инфраструктура“, соопштија индиски официјални лица. Портпаролката на војската во Њу Делхи изјави дека се уништени девет „терористички кампови“. Пакистан не го потврди ова. Пакистанската влада соопшти дека во нападите биле погодени џамии, приватни домови и административни згради.

Индија тврди дека воените акции се реакција на терористичкиот напад од 22 април во индискиот дел на Кашмир, во кој загинаа 26 лица. Индиската влада го обвинува Пакистан за вмешаност во нападот.

Државниот секретар во Министерството за надворешни работи, Викрам Мисри, изјави: „Нашите разузнавачки служби, кои ги следат терористичките единици во Пакистан, посочија дека се закануваат натамошни напади врз Индија“. Тоа мораше да се спречи.

Пакистанската влада негира каква било одговорност за нападот во Кашмир.