Новоизбраниот претседател на Соединетите Американски Држави, Доналд Трамп,  ја номинираше поранешната главна јавна обвинителка на Флорида Пем Бонди на функцијата главен јавен обвинител на САД. Таа практично ќе раководи со ресорот правда во новата администрација на Доналд Трамп. Екпертите сметаат дека нејзините шанси да стапи на функцијата се далеку подобри од оние на првичниот кандидат Мет Гец.

Бонди служеше како највисок службеник за спроведување на законот во третата најнаселена држава во САД од 2011 до 2019 година, додека во администрацијата за време на првиот мандат на Трамп беше во Комисијата за злоупотреба опиоиди и на дрога.

Трамп го објави својот избор на Пем Бонди за функцијата министерка за правда на социјалните мрежи, фалејќи ја за нејзиното обвинителско искуство.

Тој рече дека Бонди ќе стави крај на политизацијата во федералното обвинителство.

„Предолго, партиското Министерство за правда беше против мене и другите републиканци - повеќе не. Пем ќе го пренасочи Министерството за правда кон неговата цел да се бори против криминалот и да ја направи Америка повторно безбедна“, рече Трамп.

Со назначувањето на Пем Бонди, тој го замени својот поранешен кандидат за функцијата, Мет Гец, кој се повлече откако се соочи со противење од републиканците во Сенатот поради истрагата на Комитетот за етика на Претставничкиот дом за наводите за сексуални односи со малолетна девојка од 17 години, што тој ги негираше.

Поранешниот американски конгресмен Мет Гец го повлече своето име од разгледување за  функцијата министер за правда на САД во четвртокот, само неколку часа пред номинацијата на Пем Бонди. 

„Немаме време да губиме на непотребно долготрајни расправии во Вашингтон, затоа ќе го повлечам моето име од разгледување за државен обвинител. Министерството за правда на Трамп мора да биде на место и подготвено уште првиот ден“, напиша републиканецот Гец, во објавата на X.