Задоволен, американскиот претседател Доналд Трамп зачекори пред микрофоните на неговиот имот во Мар-а-Лаго: „Мислам дека имам моќ да ја завршам  оваа војна.  Мислам дека оди многу добро“, објасни Трамп. Тој не ги прифаќа критиките од украинската и европската страна поради тоа што првите разговори се одржаа без учество на Украина. Напротив, Трамп се нафрли на украинскиот претседател  Володомир Зеленски:  „И тогаш слушам 'Оххх, не бевме поканети'. Вие учествувате три години, никогаш не требаше да започнете со тоа, требаше да склучите договор“, изјави Трамп.

Остра критика против Зеленски

Обвинување на Украина? Ова ја навестува насоката во која би можел да оди договорот меѓу Русија и Украина доколку се прашуваат САД. На прашањето дали ќе го поддржи повикот на Русија за одржување  нови избори во Украина,  Трамп рече дека немало избори во Украина зашто во суштина владее воена состојба, а земјата е речиси разнесена во воздух. На луѓето им е веќе преку глава, тие сакаат нешто да се случи. Трамп укажа и на нискиот рејтинг на Зеленски кај населението, исто така, изјави дека САД немаат забелешки за  стационирање европски мировници во Украина.  „Воопшто не би имал ништо против“, изјави американскиот претседател. Тој знае дека Франција би била подготвена за ова, тоа би бил прекрасен гест. САД, од своја страна, не би морале да стационираат војници таму.

Министерот за надворешни работи ја гледа Европа на преговарачка маса

По разговорите меѓу САД и Русија што се одржаа непосредно пред тоа во Ријад во Саудиска Арабија, и американскиот државен секретар Марко Рубио и советникот за национална безбедност Мајк Волц истакнаа дека само Трамп може да донесе мир.

Притоа, Рубио звучеше подипломатски од американскиот претседател: целта е да се стави крај на овој конфликт на фер, траен и прифатлив начин за сите вклучени. Како може да изгледа тоа? Токму за тоа ќе се водат преговорите, објасни Рубио. Американскиот државен секретар додаде дека во преговорите би морале да бидат вклучени и Европејците. Едноставно затоа што и тие воведоа санкции  против Русија.

Критики од Демократите

Но, набљудувачите се сомневаат колку може да биде одржливо решение што  САД и  Русија почнуваат да го донесуваат без Украина - вклучително и во самите САД. Демократскиот сенатор Крис ван Холен за Си-Ен-Ен изјави дека Украина и многу луѓе ширум светот ќе го сфатат ова како да ги фрлаат на волците за да ги изедат. Андреа Кендал-Тејлор од тинк-тенк Центар за нова американска безбедност, на некомерцијалниот ТВ канал Пи-Би-Ес објасни дека ќе има смисла доколку  Доналд Трамп  даде нови ветувања за помош на Украина. Тогаш на Путин би му било јасно дека не може да победи на бојното поле. Но, Русија вака очигледно е во подобра преговарачка позиција од Украина. Ризикот, главниот проблем, ќе биде дека сега прво може да има мир, вели Кендал-Тејлор. Но, тоа само ќе и овозможи на Русија да ја зајакне својата позиција за повторно да ја нападне Украина во иднина и евентуално да таргетира други делови на Европа.

Републиканците стојат зад Трамп

Републиканците ги отфрлија критиките. И Украина  и Европејците сепак ќе бидат вклучени,  нагласи на пример републиканскиот сенатор Том Котон на Си-Ен-Ен. Претседателот Трамп сака прво  да воспостави дипломатски канали со Русија за да иницира континуирани рунди разговори. „Секако дека треба да го вклучиме претседателот Зеленски“, рече Котон.

Автор: Нина Барт, АРД