Пентагон потврди дека прифатил анонимна донација од повеќе милиони долари за да се придонесе за навремена исплата на платите на војниците за време на актуелниот „шатдаун“. Министерството за одбрана на САД, кое сега владата го нарекува Воено министерство, во четвртокот (23.10) ја прифати донацијата од 130 милиони долари (околу 112 милиони евра) и за такво нешто има и овластување, изјави портпарол на Пентагон.

Буџетот на американската армија обично се финансира од јавни средства. Поради тоа, плаќањето на војниците со приватни донации би било невообичаено, а според критичарите, можеби дури и нелегално. Донацијата и онака тешко ќе ги покрие сите трошоци за плати, кои, како што објави порталот „Политико“, повикувајќи се на владини претставници, само во првата половина од овој месец изнесуваат приближно 6,5 милијарди долари.

Трамп го нарекува донаторот - пријател и патриот

Претседателот на САД, Доналд Трамп, во четвртокот изјави дека пријател го информирал оти сака лично да покрие финансиски дефицит предизвикан од т.н. „шатдаун“. Трамп не го идентификуваше донаторот, кого го нарече „патриот“. Тој повторно ги обвини демократите за „шатдаунот“, кој трае повеќе од три недели и е веќе втор најдолг во историјата на САД.

Демократите и републиканците продолжуваат да се обвинуваат меѓусебно за блокадата и во Конгресот досега не успеаја да се договорат за преоден буџет. И покрај нивното мнозинство во двата дома на парламентот, Републиканците се упатени на гласови на Демократите за да го усвојат буџетот.

Поради „шатдаунот“, бројни федерални агенции во моментов работат ограничено и извршуваат само основни задачи. Според владини наводи, многу вработени не добиваат плата.