Повеќе мртви и ранети во напад во Хамбург
9 март 2023Најмалку 7 луѓе се убиени, а осум ранети во напад врз собиралиште на верската група Јеховини сведоци во Хамбург, јави германскиот весник Билд. Официјално се уште нема потврда за бројот на жртви на нападот кој се случи во четвртокот вечерта околу 21 часот.
Полицијата соопшти дека се уште не може да утврди мотив за нападот, ниту го знае точниот број на напаѓачите. Нејасно е и дали напаѓачот или напаѓачите побегнале од местото на злосторството или се меѓу жртвите.
Полицијата го блокираше целиот реон околу местото на нападот и ги повика граѓаните да не ги напуштаат своите домови.
„Сите жртви имаат прострелни рани“, изјави полициски портпарол.
Агенцијата ДПА јави дека од објектот се изнесувале тела на загинатите.
Местото околу нападот во меѓувреме го обезбедуваат голем број припадници на специјалните полициски единици, соопшти покраинскиот министер за внатрешни работи Анди Гроте.