Западот на Авганистан повторно го потресе силен земјотрес. Според американската опсерваторија за земјотреси УСГС, потресот бил со јачина од 6,3 степени и се случил на околу 28 километри северозападно од градот Херат, на длабочина од десет километри. Државната новинска агенција Бахтар известува за големи штети, уништени куќи и најмалку 100 повредени. Канцеларијата на гувернерот на провинцијата Херат соопшти дека во некои области има „огромни загуби“.

За време на викендот, во повеќе земјотреси во Авганистан, според извештаите на медиумите, загинаа речиси 2.500 луѓе. Повеќе од 2.000 лица се повредени. Канцеларијата на ОН за итна помош OЦХA објави дека бројот на загинати досега е околу 1.300. Според ОН, најмалку единаесет села биле „стопроцентно“ уништени.

Погодени се многу луѓе

Херат се наоѓа во истоимената погранична провинција во близина на Иран и е втор по големина град во Авганистан. Таму живеат повеќе од половина милион луѓе. Во саботата (7.10), најмалку осум земјотреси го потресоа регионот за краток временски период. Службата за следење на земјотресите на САД соопшти дека тие биле со јачина од 4,6 до 6,3 степени. Потреси со јачина од 5,1 степени беа регистрирани во понеделникот.

Во регионот каде што се спојуваат арапската, индиската и евроазиската плоча често има силни земјотреси. Во земјотрес во Авганистан минатата година загинаа повеќе од 1.000 луѓе. Многу куќи се направени само од глина, па затоа земјотресите често предизвикуваат големи штети.