Во шаторска населба пред српскиот парламент, подигната во март од страна на поддржувачите на владата, изутринава, според српски провладини медиуми, е рането едно лице. Освен тоа, како што се вели, има и едно уапсено лице. Српското Министерство за внатрешни работи не може да ја потврди информацијата, објаснувајќи дека „сè уште проверуваат“ што се случило пред парламентот.

Наводно во нога е ранет маж кој се наоѓал во шатор и неговиот живот не е во опасност, а уапсен е 70-годишен маж кој наводно пукал, ги запалил шаторите и во огнот фрлил грст куршуми. Телевизијата Н1 јави дека ранетиот маж има 57 години и е во стабилна состојба.

На снимки што се шират на социјалните мрежи, може да се слушне дека по палење на шаторите дошло до рафален оган, што би можело да одговара на активирање на голема количина муниција во оган.

Вучиќ зборува за терористички акт

Српскиот претседател Александар Вучиќ инцидентот го нарече - терористички чин. На свеченост по повод потпишувањето на договор за доделување на средства за купување селски куќи, Вучиќ рече дека ќе мора да го напушти настанот поради „терористичкиот чин пред Собранието на Србија“ и додаде дека ќе мора „да се занимава со некои други работи во текот на денешниот ден“.