Пожар избувна во една од галиите на реката Вардар, која што подолг период е запуштена. Огнот избувнал околу 13 часот, прво во внатрешноста, по што се проширил кон предниот дел на бродот. По интервенција на скопските пожарникари, огнот набрзо е ставен под контрола. 

Станува збор за галијата која што е лоцирана во близина на хотелот „Холидеј Ин“ во центарот на Скопје. 

Се истражуваат причините за пожарот

Командирот на Противпожарната бригада на Град Скопје, Звонко Томевски во изјава за МИА вели дека пожарот е локализиран, но причините за неговото избувнување допрва ќе се утврдуваат. 

„Засега причината е непозната, но нема довод на електрична енергија, а има поголема количина на смет, причината е најверојатно човечки фактор“, вели Томески.

Пожарникарите велат дека галијата била празна во моментот кога пристигнале и дека нема повредени, ниту загинати лица.

Една од галиите поставени во коритото на реката Вардар во Скопје беше опожарена и во март годинава. Изминативе години тие често беа и поплавувани при поројни дождови, кои што доведуваа во излевање на реката Вардар.