Германските аеродроми очекуваат, доколку цените на керозинот останат високи, во летниот период да има откажувања на летови што би можеле да погодат милиони патници. Во најлош случај, на некои аеродроми се заканува „пад на капацитетот од десет проценти“, изјави Ралф Бајзел, главен директор на Здружението на германските комерцијални аеродроми (АДВ), за весникот Велт ам Зонтаг. „Ако се пресмета за сите аеродроми, тоа би значело дека 20 милиони патници би биле засегнати“, нагласи тој.

„Постои страв дека особено кај нискобуџетните авиокомпании и туристички помалку важните дестинации ќе има дополнителни укинувања на летови“, рече директорот на АДВ. Некои дестинации тогаш воопшто нема да се опслужуваат, а други ќе се посетуваат поретко и со повисоки цени.

Керозинот двојно поскап од пред војната во Иран

Поради војната во Иран, пораснаа и цените на керозинот. „Цените на керозинот веќе повеќе од два месеца се двојно повисоки отколку пред војната“, изјави Бајзел. Тој не очекува нормализација ни во наредните месеци. „Иако керозинот е достапен, авиокомпаниите нема да можат економски да реализираат многу летови по овие цени.“ Германската министерка за економија, Катарина Рајхе, минатиот месец изјави дека снабдувањето со керозин на земјата е обезбедено.

За ублажување на последиците од кризата со керозинот, аеродромите бараат државни олеснувања. „Краткорочно е потребно укинување на данокот за воздушен сообраќај, а среднорочно барем негово преполовување“, побара Бајзел.