Северна Кореја соопшти дека тестирала нова интерконтинентална балистичка ракета со цврсто гориво, Хвасонг-18, со цел да ја зајакне способноста на земјата за нуклеарен контранапад, јавуваат севернокорејските медиуми.

Лидерот Ким Џонг-ун раководел со тестирањето на ракетата, соопшти КЦНА. Во извештајот се објавени фотографии од Ким како го гледа лансирањето, во придружба на неговата сопруга, сестра и ќерка и проектил покриен со камуфлажни мрежи на мобилен лансирен систем.

„Тестот ја докажа воената ефикасност на новата интерконтинентална балистичка ракета како способност за стратешки напад“, објави КЦНА, додавајќи дека драматично ќе го подобри стратешко одвраќање на земјата и  подготвеност за нуклеарен контранапад.

Северна Кореја ги критикуваше недамнешните заеднички воени вежби на САД и на Јужна Кореја како ескалација на тензиите, а ги засили тестовите за вооружување во последните месеци.

Развивањето интерконтинентални балистички ракети со цврсто гориво, кои можат побрзо да реагираат во кризна ситуација, долго време се сметаше за клучна цел за Северна Кореја, а Министерството за одбрана на Јужна Кореја соопшти дека Пјонгјанг сè уште го развива оружјето, што укажува дека може да се извршат уште тестови.

Последното лансирање дојде неколку дена откако Ким повика на засилување на „попрактичен и поофанзивен“ начин од воено одвраќање за да се спротивстави на, како што ги нарече Северна Кореја, потезите на агресија на САД.

Ракетата, истрелана од близина на Пјонгјанг, прелетала околу 1.000 километри пред да слета во водите источно од Северна Кореја, соопштија официјални лица.

Лансирањето на новата севернокорејска ракета предизвика страв кај жителите на северна Јапонија и остра осуда од САД и нивните сојузници.

Северна Кореја соопшти дека тестот не претставува закана за соседните земји.