При подолга престрелка пред зградата на израелскиот конзулат во Истанбул, денеска беа убиени најмалку двајца напаѓачи. Според медиумски извештаи и видео-снимки на агенцијата Ројтерс, трет напаѓач е тешко повреден. Покрај тоа, повредени се и двајца полицајци, јавија медиумите.

Инцидентот се случил непосредно пред висококатница во финансискиот кварт на турската метропола, во која е сместено дипломатското претставништво.

На видео-снимките на Ројтерс се гледа како полицајци го вадат своето оружје и се засолнуваат. Престрелката траела најмалку десет минути. Едно лице било облеано во крв. Друг материјал прикажува осомничен напаѓач кој се движи меѓу паркирани бели полициски комбиња. Тој пукал неколку минути со автоматска пушка и со рачно огнено оружје. На блиските улици и тревни површини лежеле две тела.

Од почетокот на војната меѓу Израел и радикално-исламистичкиот Хамас во Појасот Газа во октомври 2023 година, во околината на конзулатот има силно вооружено полициско присуство. Но, моментално нема израелски дипломати стационирани во Турција, јавува Ројтерс, повикувајќи се на неименувано лице запознаено со ситуацијата.