Руските претседателски избори ќе се одржат на 17 март наредната година и на териториите окупирани од Русија, на истокот и на југот на Украина, одлучи денеска руската изборна комисија.

Членовите на руската Централна изборна комисија усвоија резолуција со која го одобруваат тоа. Во 2023 година, регионални избори под руска команда веќе се одржаа во бесправно анектираните области.

Русија веќе организираше избори на тие територии - Запорожје, Керсон, Доњецк и Луганск, кои ги анектираше во септември 2022 година, а кои делумно се под нејзина контрола.

Централната изборна комисија на Руската Федерација, по консултации со Министерството за одбрана, ФСБ на Русија и лидерите на четирите нови региони, одлучи да се одржат претседателски избори на териториите на новите конститутивни ентитети на Руската Федерација. 

Минатата недела горниот дом на рускиот парламент, Советот на Федерацијата, го одреди датумот на претседателските избори за 17 март 2024 година. Претседателот Владимир Путин веќе изјави дека ќе се кандидира повторно - по петти пат.

Лидерот на Кремљ кој е на власт речиси 24 години претходно најави дека сака на претседателските избори да се гласа и во окупираните области во Украина. 

Киев остро реагираше и ги прогласи руските избори на 17 март 2024 година за „ништовни и неважечки“ и вети дека ќе ги гони сите набљудувачи што ќе го следат гласањето  Русија, која води агресорска војна против Украина од февруари 2022 година, тврди дека ги анектирала регионите Доњецк, Луганск, Запорожје и Керсон по  референдумите таму во минатата година. Киев и меѓународната заедница не ја признаваат анексијата. Москва не контролира целосно ниту еден од регионите. Во 2014 година, Русија го окупираше и Крим.