Илјадници Палестинци се враќаат во своите станбени области во Појасот Газа по стапувањето во сила на прекинот на огнот меѓу Израел и радикалниот исламистички Хамас. Денеска, пеш, со автомобили и со колички, тие се движеа првенствено кон север, кон главно уништената крајбрежна област. Претходно, израелските трупи, како дел од првата фаза од договорот постигнат со посредство на САД, се повлекоа зад договорените линии. „Чувството е неописливо, фала му на Бога“, рече Набила Басал, која беше на пат со својата ќерка. „Многу, многу сме среќни што војната запре и што заврши страдањето“.

Со повлекувањето на израелските трупи од главните урбани области, започна рок од 72 часа за Хамас да ги ослободи своите заложници. „Многу сме возбудени и го чекаме нашиот син и сите 48 заложници“, рече Хагај Ангрест, чиј син е меѓу 20-те израелски заложници за кои се верува дека уште се живи. „Чекаме повик“. За возврат, по предавањето на заложниците, Израел треба да ослободи 250 Палестинци со долги затворски казни, како и 1.700 затвореници кои беа заробени за време на војната.

Исто така, според договорот, стотици камиони со хуманитарна помош секој ден треба да влегуваат во Појасот Газа.

Иднината на мирот и улогата на Трамп остануваат неизвесни

Сепак, остануваат прашањата дали примирјето и размената ќе доведат до траен мир. Основата е планот од 20 точки на американскиот претседател Доналд Трамп, кој сè уште не е целосно договорен. Тој се однесува на идното управување во Појасот Газа и судбината на Хамас, кој го отфрла барањето на Израел за разоружување.

Наскоро се очекува Трамп да го посети регионот. Меѓу другото, треба да одржи говор пред израелскиот парламент, Кнесетот, како прв претседател на САД по Џорџ В. Буш во 2008 година. Трамп, исто така, најави патување во Египет.