Израелската армија се повлече од град во јужен Либан како дел од договорот за прекин на огнот, се вели од Централната команда на САД. Како што е оттаму соопштено, командантот, генерал Ерик Курила, бил присутен во штабот за спроведување и следење на прекинот на огнот за време на тековното првично повлекување на израелските сили и нивното заменување со либански сили во Ал-Чиам, Либан.

Ова, како што нагласува Курила, е „важен прв чекор за постигнување на траен прекин на борбите и ги поставува темелите за понатамошен напредок“. „Ги поздравуваме напорите на армијата“ за создавање „стабилност на југот“, напиша од своја страна либанскиот премиер Наџиб Микати на платформата X.

Во меѓувреме, армијата на Израел соопшти дека нејзината седма бригада „ја заврши мисијата во Чиам, јужен Либан“. Во согласност со договорот за прекин на огнот и во координација со САД, либанските војници ќе бидат стационирани во областа заедно со мировните сили на ОН во Либан (Унифил).

Договорот за прекин на огнот постигнат со посредство на САД и Франција стапи на сила на 27-ми ноември. Со него се предвидува дека израелската армија ќе го напушти јужниот дел на Либан во рок од 60 дена. Либанската милиција Хезболах, од своја страна, треба да се повлече од граничната област зад реката Литани и да ги растури своите воени бази. Во областа треба да останат само либанската армија и сините шлемови од мировната мисија на ОН.