Американскиот државен секретар Марко Рубио демонстративно застана зад унгарскиот премиер  Виктор Орбан  само неколку недели пред парламентарните избори во земјата, закажани за 12 април.
„Со целосна уверливост можам да ви кажам дека претседателот  Доналд Трамп  се залага за вашиот успех, затоа што вашиот успех е и наш успех“, изјави Рубио денеска на заедничката прес-конференција со Орбан во Будимпешта.

Унгарците на 12 април ќе избираат нов состав на парламентот. Орбан, кој владее од 2010 година со неговата национално-конзервативна партија  Фидес, се соочува со зголемен политички притисок:  според актуелните анкети,  Фидес заостанува зад опозициската партија Тиса,  предводена од Петер Маѓар.

Пред средбата со Орбан, американскиот Стејт департмент соопшти дека разговорите се насочени кон „зајакнување на заедничките билатерални и регионални интереси, вклучително и нашата посветеност на мировни процеси за решавање глобални конфликти“.

Орбан долго време се претставува како „пријател“ на американскиот претседател Доналд Трамп и во бројни позиции, особено во однос на војната во Украина, се оддалечува од ставовите на мнозинството европски држави.
И покрај руската инвазија, Унгарија одржува стабилни односи со Кремљ и останува силно зависна од руските енергетски извори.

За време на неодамнешната посета на Вашингтон, Орбан успеа да добие исклучок за Унгарија  од американските санкции што се однесуваат на земји кои увезуваат руска нафта и гас.