Услугата за пораки WhatsApp ја обвинува руската влада за обид за целосна блокада. Исклучувањето на над 100 милиони корисници од безбедна и приватна комуникација ќе доведе до помала безбедност за луѓето во  Русија,  критикуваше портпаролот на апликацијата, која припаѓа на концернот Мета, во чија сопственост е и Фејсбук. Компанијата изјави дека ќе стори сè што е можно за да се осигура дека корисниците остануваат поврзани.

Руската влада веќе некое време постепено ја ограничува функцијата на меѓународните апликации за пораки.  Телеграм  и iMessage услугата на Епл исто така се ограничени.

Вотсап користи енкрипција од крај до крај, што значи дека само вклучените корисници можат да видат пораки во обичен текст - не самиот Вотсап.

Портпаролот на Кремљ, Дмитри Песков, изјави дека Мета би можела да продолжи со работа ако се усогласи со рускиот закон и „влезе во дијалог“ со властите. „Тогаш имаме можност да постигнеме договор“, рече тој, додавајќи дека во спротивно „нема шанси“. Во меѓувреме, весникот „Фајненшл тајмс“ претходно објави дека властите ја отстраниле апликацијата од еквивалентот на онлајн именик што го води рускиот регулатор за комуникации, Роскомнадзор.

Од почетокот на агресорската  војна во Украина,  руските власти драстично ја зајакнаа контролата и цензурата на интернет. Додека  странските услуги се ограничени,  во Русија е форсиран домашниот месинџер Max. Вотсап во своето соопштение зборува за  „апликација за државен надзор“  на која руската влада сака да ги принуди корисниците да ја користат.