САД ќе ѝ продадат 600 ракети „Патриот“ на Германија
16 август 2024![Систем за воздушна одбрана „Патриот“](https://static.dw.com/image/67011404_800.webp)
Американската влада одобри продажба на до 600 проектили и друга опрема за системите за воздушна одбрана „Патриот“ на Германија. Противвоздушното оружје е во вредност од околу 5 милијарди долари, соопшти Пентагон.
Главниот изведувач е американската одбранбена компанија Локхид Мартин. Останува нејасно кога ракетите ќе стигнат во Германија. Договорите за оружје од овој вид обично траат неколку години.
Продажбата на ракетите од типот PAC-3 MSE „Патриот“ била одобрена од американскиот Стејт департмент. Надлежната служба официјално го известила американскиот Конгрес, кој допрва треба да го одобри договорот за оружје.
Договорот „ќе ја подобри способноста на Германија да одговори на сегашните и идните закани и ќе ја зголеми одбранбената способност на нејзините вооружени сили“, соопшти службата.Освен тоа, ќе ја поддржи Германија со цел „да ја подобри нејзината национална и територијална одбрана, како и интероперабилноста со вооружените сили на САД и НАТО“.
Новите одбранбени планови на НАТО бараат од Германија четирикратно да ја зголеми воздушната одбрана за да ги заштити инфраструктурата и вооружените сили во случај на сериозни тензии или војна, изјавија безбедносни извори минатиот месец.
Системот „Патриот“ е еден од најсовремените противвоздушни системи во светот. Тој може да се користи за борба против непријателски авиони, балистички ракети и крстосувачки ракети. Германија и други земји неодамна ѝ предадоа неколку од овие системи на Украина. Тие се наменети да ѝ помогнат на земјата да се заштити од руските воздушни напади.