Американскиот претседател Џо Бајден во неделата потврди дека постигнал договор со републиканскиот спикер на Претставничкиот дом Кевин Мекарти за зголемување на лимитот за задолжување од 31,4 трилиони долари до 1 јануари 2025 година и оти Конгресот сега може да гласа за тоа. Компромисниот предлог-закон кој го изготвија Бајден и Меккарти и кој американскиот претседател го нарече „конечно решение“ има 99 страници. 

„Овој договор е добра вест за американскиот народ“, им рече Бајден на новинарите во Белата куќа по разговорот со Меккарти во кој беа утврдени последните детали на компромисниот предлог-закон. „Ова ја симнува од маса катастрофалната закана од банкрот и го штитат нашето тешко остварено и историско економско закрепнување“, додаде Бајден.

Договорот за јавниот долг, кој ја спречува владата да прогласи банкрот за првпат во американската историја, доаѓа по неколкунеделни преговори меѓу Бајден и републиканците во Претставничкиот дом.

Договорот сепак мора да помине низ поделениот законодавен дом пред 5 јуни, кога американското Министерство за финансии би објавило дека му снема пари. „Силно ги повикувам двата дома да го прифатат договорот“, рече Бајден.

Договорот беше критикуван од десничарските републиканци и левичарските демократи, но Мекарти претходно во неделата изјави дека верува дека ја има поддршката од повеќето републиканци.

Договорот ќе го суспендира лимитот на долгот до 1 јануари 2025 година, ќе ги ограничи државните трошоци во буџетите за 2024 и 2025 година, ќе ги врати неискористените средства наменети за борба против пандемијата, ќе го забрза издавањето дозволи за некои енергетски проекти и ќе воведе дополнителни работни обврски во социјалните програми.