Новоизбраниот претседател на САД, Доналд Трамп најави дека неговата менаџерка на кампањата Сузан Самерл Вајлс ќе ја извршува функцијата шефица на кабинетот во Белата куќа.

Со тоа таа ќе стане прва жена во американската историја на чело на кабинетот во Белата куќа. „Сузи е силна, паметна, иновативна и исклучително почитувана. Таа ќе биде клучна во остварувањето на нашите цели да ја направиме Америка повторно голема. Чест е да се биде првата жена на оваа позиција и сигурен сум дека ќе ја направи нашата земја горда“, се вели во соопштението на Трамп.

Вајлс, долгогодишен републикански стратег од Флорида, се здоби со широко признание за нејзината улога во управувањето со кампањата на Трамп во Флорида во 2016 и во 2020 година. Пред тоа, таа беше менаџер на кампањата за гувернер на Флорида во 2010 година на Рик Скот и накратко раководеше со кампањата на поранешниот гувернер на Јута, Џон Хантсман, во 2012 година.

Агенцијата Асошиејтед прес наведува дека Вајлс е во голема мерка одговорна за водењето на кампањата на Трамп, која ја смета за најдисциплинирана и најефикасна досега.

АП известува дека Вајлс настојувала да остане подалеку од очите на јавноста, дури и избегнувала да зборува за време на прославата на победата на Трамп. Како дел од изборната процедура, откако ќе се пребројат гласовите и ќе бидат потврдени резултатите во сите сојузни американски држави, ќе гласаат електорите ширум Америка во декември. Тогаш Конгресот ќе го потврди изборот на Трамп за претседател на почетокот на јануари.

Инаугурацијата на новиот претседател на САД е закажана за 20 јануари 2025 година во Вашингтон. Според последните податоци, Трамп на претседателските избори освоил 295 електронски гласови, додека неговата противкандидатка од Демократската партија Камала Харис освоила 226.