Долниот дом на јапонскиот парламент ја избра Санае Такаичи, лидерка на владејачката Либерално-демократска партија (ЛДП), за прва жена премиер во земјата.

Поранешната министерка за внатрешни работи на Јапонија, Санае Такаичи, важи за човек од доверба на поранешниот премиер Шинзо Абе и со нејзиниот избор јапонската политика врти јасно кон десно. Такаичи застапува лабава фискална политика. Освен тоа, таа бара промена на пацифистичкиот повоен устав на Јапонија за да се одговори на растечкото значење на армијата. Лидерката на ЛДП редовно го посетува контроверзното светилиште Јасукуни, во кое им се оддава почит на Јапонците загинати во војната - вклучително и погубените воени злосторници. Затоа, светилиштето во некои соседни земји се смета за симбол на поранешниот милитаризам на земјата. Такаичи зазема и построг став во врска со имиграциската политика.

64-годишната премиерка го наследува релативно либералниот Шигеру Ишиба, кој поднесе оставка по серија изборни порази на својата Либерално-демократска партија (ЛДП).

Такаичи го должи својот избор на новиот партнер на ЛДП, конзервативно-неолибералната партија Ишин. Опозицискиот табор не можеше да се договори за заеднички кандидат. Но, со оглед на тоа што ЛДП, како најголема партија, дури и во коалиција со Ишин за малку не успеа да обезбеди парламентарно мнозинство, Јапонија и натаму ќе има малцинска влада.