Се повеќе исламистички инциденти во германските училишта
3 септември 2024![училиште](https://static.dw.com/image/68155925_800.webp)
Закани со бомби и напади, антисемитски навреди и вжештена атмосфера: последиците од конфликтот на Блискиот Исток се чувствуваат и во училиштата во Германија. Анкетата на истражувачката платформа Фолбилд (Vollbild) на германскиот јавен сервис СВР, спроведено во покраинските министерства за внатрешни работи и образование, покажува забележлива радикализација на учениците, како и зголемување на бројот на екстремистички инциденти во училиштата, како и се полоша атмосфера во училниците. Така, Министерството за образование во Хесен известува за значително зголемување: од 2018 година се регистрирани 15 инциденти во училиштата мотивирани од исламисти, од кои 14 во 2023 година. Од нив, 11 случаи се „временски и тематски“ поврзани со терористичкиот напад на Хамас врз Израел. Шест извештаи се однесуваат на анонимни закани со бомби во училиштата во Хесен. Сепак, бројот на инциденти во 2024 година повторно падна во споредба со 2023 година.
„Понапната и пожешка атмосфера“
Министерството за образование на Рајнланд Фалц соопшти дека не може да се занемари дека атмосферата е „понапната и вжештена“ отколку што била. Иако нема зголемување на инцидентите, има поединечни закани за напад на училишта, во контекст на конфликтот на Блискиот Исток . Шлезвиг-Холштајн, од друга страна, забележува „благ пораст на активностите мотивирани од исламисти кои се појавуваат во училиштата“. Други провинции пријавуваат поединечни случаи на радикализација.
Министерството за внатрешни работи на Бранденбург пишува дека „блискоисточниот конфликт ќе продолжи да биде причина за мобилизација“ и еден вид катализатор...„Во исто време, се чини, постојат и разлики меѓу провинциите. Берлин наведува дека ситуацијата во училиштата на почетокот била „напната“, но сега повторно се смирила – „во согласност со околностите“. Некои провинции не одговорија на новинарско прашање или изјавија дека не регистрираат исламистички инциденти во училиштата.
Халденванг: конфликтот на Блискиот Исток како „катализатор“
Тековните податоци од Федералната канцеларија за криминал (БКА) покажуваат дека израелскиот контранапад врз Појасот Газа на 7 октомври 2023 година имал силно влијание во Германија. После тоа, во 2023 година се евидентирани 4.368 кривични дела со антисемитско потекло. Повеќе од половина од овие дела се случија по 7 октомври, односно по нападот на Хамас врз Израел и почетокот на војната во Газа.
За споредба, во 2022 година, БКА забележала само 61 такво дело. Тоа е повеќе од седумдесет пати зголемување. Претседателот на германската Служба за заштита на уставниот поредок на федерално ниво, Томас Халденванг, забележува сличен развој и вели: „Блискоисточниот конфликт делуваше како катализатор за антисемитизмот во Германија“.
Наставниците и социјалните работници секојдневно ја забележуваат отвореноста на некои млади луѓе кон исламистичките идеи. Така, студентите, на пример, го нарекоа Хамас „движење за слобода“ или бараа одделни часови за момчиња и девојчиња.
Поранешна учителка од Северна Рајна Вестфалија известува за своите искуства со радикализирани ученици: „Според нив, девојчињата и момчињата треба да имаат одделни часови, а исто така мислат дека часовите по пливање не се добри за девојчињата. Сметаат и дека девојките на одредена возраст треба да останат дома и да се подготвуваат за улогата на сопруга - ова беа изјавите на учениците“. Дури еден, додава оваа наставничка, одбил да разговара со друг ученик со образложение: „Не разговарам со него, тој е христијанин“.
Шаи Хофман е социјален претприемач и активист. Од 7 октомври тој ги посетува училиштата со палестински колега за да разговара со учениците за нивните емоции предизвикани од конфликтот на Блискиот Исток. „Ние всушност се обидуваме да изгасиме голем пожар со мал апарат за гаснење пожар“, вели Хофман. Наставниците често се преоптоварени од ситуацијата и ретко можат да ги поддржат учениците во вакви итни ситуации.
Исламистичките инфлуенсери ја користат ситуацијата
Покрај силната емоционализација поради блискоисточниот конфликт, која Хофман ја забележува кај студентите, истражувањето на Фолбилд покажува и дека постои голема опасност од исламистичките проповедници и влијателни лица. Ова е развојот на ситуацијата што Службата за заштита на уставниот поредок со загриженост ја следи: „Потенцијалната опасност за младите од исламистичките инфлуенсери, кои се активни на социјалните мрежи, е голема“, вели Мартин Хорбах, шеф на одделот за исламизам во Државната служба за заштита на уставниот поредок Баден-Виртемберг.
Неговиот колега од Берлин, Мајкл Фишер, исто така забележува ново ниво на опасност од исламистичките групи: „Она што е ново сега е фокусот и досегот што овие групи можат да го постигнат. И сето ова е директно поврзано со конфликтот на Блискиот Исток и настаните по ужасниот напад на Хамас врз Израел на 7 октомври минатата година“.
Колку е ова потенцијално опасно покажува експериментот што го спроведе експертот за екстремизам Навид Вали од „Мрежата за спречување насилство“ заедно со истражувачката платформа Фолбилд. Ова јасно покажува колку брзо малолетник, кој е заинтересиран за религиозни, исламски прашања, доаѓа во контакт со радикални исламистички содржини на апликации како што е ТикТок. „Се разбира, првиот контакт никогаш не оди преку екстремистичка содржина, туку преку теолошки понуди, кои на прв поглед изгледаат непроблематични и безопасни“, вели Вали. Но, по само неколку минути се прикажува навидум безопасно молитвено видео во кое Вали препознава познат актер од салафи сцената.
Исламистичките актери се насочени кон младите луѓе
Ова не е случајно, бидејќи исламистичките инфлуенсери свесно го користат конфликтот на Блискиот Исток за да насочат радикална пропаганда кон младите. Па така, групата „Муслимански интерактив“ , која е надгледувана од Службата за заштита на уставниот поредок, побара калифат на демонстрациите во Хамбург оваа пролет. На интернет се појавува со пропагандни видеа кои наликуваат на музички спотови со поп и хип-хоп елементи, пристапен начин прилагоден на јазикот на младите, вели истражувачот на екстремизмот. Вали се жали дека училиштата немаат таков вид медиумска писменост.
„Демократијата мора постојано да се учи“
Германските покраини во истражувањето на Фолбилд наведуваат дека сериозно го сфаќаат прашањето за медиумската писменост во училиштата. Несогласувања постојат само околу прашањето дали е потребен посебен училишен предмет кој се занимава со медиумска писменост. Додека Хесен планира да ја консолидира оваа тема во посебна тема, Министерството за образование на Саксонија смета дека ова е „непрактично“.
Државната секретарка во Министерството за образование на Баден-Виртемберг, Сандра Босер (Б'90/Зелени) ја гледа борбата против радикализацијата на младите како задача на целото општество. Училиштето игра клучна улога, но не може само по себе да ги реши сите проблеми, вели таа и додава: „Училиштето сигурно не може се. Нашите здруженија играат подеднакво важна улога како училиштето, но и домот. Затоа што демократијата треба постојано да се учи“.