По шест месеци стивнаа заканите за лажни бомби во училиштата и институциите во Северна Македонија, но на полициската истрага се уште не и` се гледа крајот. Министерот за внатрешни работи, Оливер Спасовски вели дека е лоцирана група за која што се претпоставува дека стои зад јануарскителажни дојави за бомби, кога земјата се најде под интензивен удар на хибридните закани. Во тек е вештачење на доказниот материјал, по што ќе бидат поднесени соодветни пријави. 

„Ниту едно откривање на кривично дело не може да биде детерминирано со временска рамка, ниту во минути, денови или недели. Многу е важно да имате квалитетно завршена работа и тоа што ќе го поднесете да биде поддржано со докази“, изјави денеска Спасовски на Националната конвенција за ЕУ во Северна Македонија на тема „Зајакнување на отпорноста и подобрување на капацитетите за одговор на хибридните закани“ во организација на Европското движење.

Над 100 дојави за лажни бомби

Спасовски вели дека групата, за која што веќе имаше информации дека е од Иран и Русија, е лоцирана врз основа на преземени криминалистички активности од страна на секторите за борба против тероризмот, компјутерски криминал и меѓународна полициска соработка.

Полицијата претходно поднесе пет кривични пријави, некои се однесуваа на заканите во училиштата во Скопје, а целосно е расчистен случајот за дојавите во Кавадарци, како и случаите во Делчево и Тетово. Полицијата во соработка со експерти од странство работи и на истрага за „хибридниот напад“ на Фондот за здравствено осигурување, чија работа беше блокирана.

„Tоа е хибриден напад и таму сè уште се работи. Тоа е една огромна работа заради тоа што, знаете дека таму беше извршен напад во кој што беа загрозени многу документи и во овој дел имавме такви, имавме и во Бирото за јавни набавки, така да таму се работи на обезбедување на целосно затворање“, рече министерот.

Претпоставки

Половина година лажните закани со бомби внесуваат немир во регионот и во Северна Македонија. Од претпоставки за хибридна војна, странски сили, тинејџери кои сакаат да избегаат од часови, па се до кластер на заканувачи на кои полицијата им влегла во траг. Ова се само дел од сценаријата коишто беа разгледувани од страна на институциите.

Заканите започнаа на 26 октомври 2022 година. Мета беа пред се училиштата, каде речиси секојдневно пристигнуваа дојави за поставени бомби. Тензијата започна во Скопје, но набргу се прошири и во останатите градови. Алармот се вклучи и во државните институции, аеродромот, железничката станица, трговските центри, медиумите кои исто така се најдоа на мета на лажните дојави.

Од октомври до крајот на 2022 година се евидентирани над 380 лажни пријави, додека од јануари досега имало над 580 лажни дојави за поставени бомби. „Од октомври до март, поради дојави за бомби биле проверени 862 локации во Скопје, ангажирани над две и пол илјади полициски службеници и потрошени над 5 милиони денари“, изјави неодамна во интервју за ДВ, министерот за внатрешни работи, Оливер Спасовски.