Шест Палестинци се убиени во судири со израелските сили во областа Тулкарм на северот од окупираниот Западен Брег, објавија денеска палестинските автономни власти.

Судирите избија за време на израелската воена операција во градот Тулкарм и тамошната бегалска населба, изјави за агенцијата Франс прес Амин Кадер, директор на болницата Табет.

Очевидци изјавија дека таму имало бројни израелски сили во операцијата за апсење, како што наведоа, на млади луѓе.

Израелската војска потврди за Франс прес дека спроведува операција во областа, но не ја соопшти причината ниту бројот на жртви.

Во четвртокот, палестинското Министерство за здравство соопшти дека 14 лица биле убиени тој ден за време на судирите во Џенин, исто така, на северниот дел на Западниот Брег.

Тоа е најсмртоносниот ден на оваа територија од 2005 година, кога ОН почнаа да го бележат бројот на жртвите на израелските упади.

За израелската војска, овие операции се, како што се наведува, одговор на значителното зголемување на терористичките напади на Западниот Брег, окупиран од 1967 година, од почетокот на војната меѓу Израел и исламистичкиот Хамас во Појасот Газа на 7 октомври. Оттогаш, забележани се повеќе од 550 обиди за напади.

Од почетокот на војната предизвикана од ненадејните терористички напади на Хамас врз Израел, околу 187 Палестинци се убиени на Западниот Брег од израелски војници или од еврејски доселеници, според податоците на тамошното Министерство за здравство.