Скопје се расчистува по невремето, двајца полесно повредени
31 август 2022![Северна Македонија Скопје Невреме](https://static.dw.com/image/62976542_800.webp)
По бурната ноќ поради силното невреме кое во вторникот го зафати Скопје, утрово состојбата е стабилизирана, а службите работат на отстранување на последиците кои ги предизвикаа поројните дождови и силниот ветер.
Центарот за управување со кризи (ЦУК) соопшти дека биле примени околу 180 пријави од граѓаните кои, во најголем дел, се жалеле на поплавени простории од објекти, паднати дрвја, оштетени возила и поплавени улици и подвозници и оштетени кровни конструкции. Од ЦУК информираат дека две лица се здобиле со полесни повреди во невремето откако дрво паднало врз нивниот автомобил во движење.
Градоначалничката на Скопје, Данела Арсовска синоќа (30.08) преку социјалните мрежи соопшти дека ги мобилизирала сите екипи и дека противпожарната бригада успеала да спаси над 20 лица од поплавите.
Арсовска ќе бара одговорност
Арсовска најави и дека ќе бара одговорност за „несоодветната атмосферска инфраструктура особено на ново реконструираните градски булевари каде се предизвикани најголеми штети.“
Од ЕВН успеале да ги отстранат сите дефекти во електросистемот во повеќе реони на градот, но останале нерешени проблемите во селата Дворце и Радуша во општина Сарај.
Во текот на ноќта, екипи на „Водовод“ работеле на исцрпување на насобраната вода и на одзатнување на атмосферската канализација на критичните места на скопските сообраќајници.
Повеќе граѓани со своите автомобили во вторникот останаа заглавени во длабока вода на неколку критични подвозници во градот. Во неколку случаи интервенираа пожарникарите и полицијата.
Градските служби интервенирале за расчистување на сливници и паднати дрва на речиси сите поголеми булевари во градот.
Граѓаните реагираа и на социјалните мрежи за хаосот што се случуваше во текот на невремето и потоа.