Владата најави интервентна заштита на споменикот „Македониум“ во Крушево за што се обезбедени 2,5 милиони денари. Паралелно на ова, НУ Завод и музеј Прилеп работи на проект за целосна реконструкција и конзервација на целиот комплекс. Овој проект ќе биде финализиран до средината на 2026 година, по што Министерството за култура и туризам ќе ја утврди динамиката и планот за финансирање на целосната реконструкција.

„Споменикот ’Македониум’ во Крушево нема да биде оставен да пропаѓа, ќе го реконструираме, ќе го сочуваме и ќе му ја вратиме заслужената слава“, изјави на прес-конференција владината портпаролка, Марија Митева.

Под во вода - оштетени витражи

Најавата следи по видеото коешто го објави Дојче веле во понеделникот, на 8 септември. Во него се алармираше дека подот на споменикот „Илинден“ е покриен со вода, а оштетените витражи ја пропуштаат атмосферската вода и влага во објектот. При пороен дожд водата стигнува и до гробот на Никола Карев, претседателот на крушевската република.

Експертиза од странство

„Македониумот“ е уникатен архитектонски и уметнички објект во Македонија, создаден со бетон, витражи и специфични материјали што бараат врвна стручност. Затоа и дел од експертизата ќе треба да се обезбеди од странство, како гаранција дека ова културно наследство ќе биде трајно заштитено.

Реконструкцијата на „Македониумот“ започна пред повеќе години и требаше да биде завршена во 2017 година. Но, според Митева, процесот бил насилно прекинат и оставен без потребна заштита. Од тогаш до денес, цели седум години не било преземено ништо за негово завршување и заштита. „Тој застој, создаден во минатото, остави длабоки последици врз состојбата на овој значаен културен споменик“, вели таа.