На десеттата годишнина од почетокот на Берлинскиот процес, германскиот канцелар Олаф Шолц очекува земјите од Западниот Балкан да го забрзаат својот пат кон ЕУ.

„Се надевам дека нема да бидат потребни уште десет години, додека сите шест земји да станат членки на ЕУ“, изјави Шолц на заедничката прес-конференција со претседателката на Европската комисија Урсула фон дер Лајен по самитот ЕУ- Западен Балкан во Берлин.

Во својата изјава по самитот, Шолц недвосмислено порача дека земјите од Западниот Балкан можат да влезат во ЕУ само заедно. Подоцна, на прес-конференцијата, дополни дека и покрај желбата сите земји да имаат заедничка перспектива, ќе има земји кои ќе ги исполнат условите побрзо од другите „кои нема да ги задржуваме (...), но сите треба да знаат дека ќе имаат заедничка иднина и дека не можат да се блокираат меѓусебно“. 

Претседателката на ЕК, Фон дер Лајен порача дека членството во ЕУ и понатаму ќе биде врз база на заслуги.

„Мерит системот ќе остане во иднина. Секако колку повеќе земји се движат напред толку подобро, но се зависи од успесите на секоја земја поединечно“, рече Фон дер Лајен. 

Конфликтите се уште тежат  

Конфликтите од минатото и националистичките тенденции и натаму ја отежнуваат соработката, рече Шолц. Тој го критикуваше бавното спроведување на договорот за нормализација на односите меѓу Србија и Косово. Повика и во другите земји да се прекине со националистичка реторика и политиката на поделби. Таквата реторика, рече Шолц, е опасност за заедничкиот напредок и соживот во мир и благосостојба. 

Во текот на самитот беа потпишани два важни документи: шесте земји се обврзаа да создадат единствен регионален пазар за периодот од 2025 до 2028 година. Беше потпишан и договор за пристап до високо образование за студентите во регионот.