Секој ден излегуваат нови докази кои потврдуваат дека истрагата за трагедијата во Кочани е политички воден процес, а не професионален или уште помалку независен процес, обвинува ДУИ.

Според опозициската партија, она што јавно се демонстрира воопшто не е истрага, туку фарса.

„Системот од петни жили се труди да најде некој друг кому ќе ја префрли вината", велат од ДУИ.

Оттаму тврдат дека одредени професионалци во полицијата од Кочани не можеле да премолчат пред очигледните злоупотреби и испраќале т.н. проблемски информации за состојбите во „Пулс“.

„Она што е јасно, е дека преку овие архивирани дописи сите во полициската команда знаеле за малолетници што се забавувале по полноќ, за постојаните тепачки, за редовната дистрибуција на дрога, за безбедносните прекршоци, за очајните услови во кои работел објектот, па дури и за хаосот со паркирањето. Знаеле командирите во Кочани, началниците во Штип, раководителите во Бирото за јавна безбедност“, велат од Мала Речица. 

Суспензија, независна истрага и процес за прикривачите

Поради тоа, во ДУИ сметаат дека сега се создава нова приказна во која ниту еден полициски раководител или началник не е виновен, а е обвинет поранешен министер за економија, кој никогаш не стапнал во Кочани и немал никаква надлежност за безбедносни проверки на објекти или контрола на локали.

„Цинизмот со кој на јавна сцена не само што се прави обид да се скрие вистината и да се заштитат оние што се вистински одговорни, туку за тоа неправедно да се обвинат било кои поранешни функционери и претставници на опозицијата, претставува суштински монструозен план. Јасно е дека на власта не ѝ е потребна правда, туку алиби", обвинува ДУИ.

Од оваа партија јавно истакнуваат три барања. Прво, итна суспензија на целата командна структура по вертикала во МВР и Бирото за јавна безбедност, кои знаеле за проблемите со „Пулс“, а не реагирале.

Второ, независна истрага, надвор од рацете на оние што ја овозможиле трагедијата, со цел да се утврди под чија заштита му е обезбедено на објектот „Пулс" да работи.

Трето, отворање нов процес против сите оние кои активно работат на прикривање на вистината и креирање монструозни случаи како алиби за вистинските виновници.

„Нема да замолчиме и постојано ќе инсистираме на одговори, затоа што не смееме да дозволиме оваа трагедија да биде покриена со лаги и монструозни манипулации“, порачуваат од ДУИ.

Адеми: Политичка конструкција и прогон

Потпретседателот на ДУИ, Арбр Адеми, смета дека во случајот со неговиот сопартиец - поранешениот министер за економија Крешник Бектеши, се работи за политичка конструкција и прогон. Во разговор за ТВ 21 посочува дека и други лица од семејството Бектеши биле цел на политички прогон.

„Во семејството на Крешник има најмалку 6 лица кои биле политички затвореници. Синот на неговата тетка, Адем Карага - актерот, заедно со неговата мајка, тетка на Крешник, биле политички затвореници пред војната во 2001 година. Политички затвореници биле и двајцата синови на другата тетка на Крешник, а двајцата вујковци на Крешник биле политички затвореници во периодот 1979-1982 година. Третиот вујко побара политички азил во Шведска како пријател на Јусуф Грвала“, вели Адеми.

ВЛЕН: И ние сакаме Бекеши да ја докаже дека е невин

Додека од ДУИ истрагата ја нарекуваат „фарса“ и „политички воден процес", од ВЛЕН потсетуваат дека вина утврдуваат правосудните органи, а не политичките актери.

„ВЛЕН сака Крешник Бектеши да ја докаже својата невиност, бидејќи и покрај тоа што сме политички противници, не сакаме ниту еден Албанец да го носи товарот за кочанската трагедија. Но, за ова одлучуваат правосудните органи, а не политичките актери“, порачаа од владејачката коалиција.

Оттаму велат дека ДУИ се трансформирала во партија чија единствена идеологија е заштитата на нејзините поранешни функционери, а за таа цел е подготвена да ги бојкотира локалните избори и да се обиде да предизвика политичка криза.

„Кога ДУИ зборува за системот, мора да одговори за што точно мисли. На системот што нивниот режим го создаваше 22 години, додека беа дел од сите влади на СДСМ и ВМРО-ДПМНЕ? На јавното обвинителство на Ислам Абази? На бегалците од правдата Артан Груби и Прпарим Бајрами? На системот на владеење во кој врз грбот на Албанците ДУИ направи милионери од голобради функционери? На системот во кој имаше селективна одговорност за трагедиите во модуларната болница во Тетово, Ласкарци, Беса Транс?“, прашаа од ВЛЕН.

Тајност на постапката

Од Обинителството велат дека тимот кој ја води предистражната постапка континуирано презема повеќе истражни дејствија и во однос на повеќе различни институции, за обезбедување докази - распити, анализи и вештачења од голем обем.

„Меѓутоа, за да се зачува тајност на постапката и да се спречи компромитирање на доказите Обвинителството не е во можност во моментов да открива повеќе детали за активностите“, соопштија вчера од Обвинителството.