По неуспешните гласања за недоверба на француската влада во Националното собрание, голем број луѓе во многу градови ширум земјата излегоа на улиците да го изразат својот гнев поради усвоената реформа на пензискиот систем. На некои од протестите избувна и насилство. Во прв ред во главниот град Париз, каде дојде до судири меѓу демонстрантите и полицијата, која употребила палки и солзавец. Медиумите јавуваат дека се уапсени најмалку 142 лица.

Во текот на ноќта се повредени 11 полицајци, повикувајќи се на полициски извори. Само во Париз распоредени биле околу 2.000 полицајци. Според Франс инфо, спонтани демонстрации имало и во други градови како Сент Етјен, Стразбур, Амиен, Каен и Тулуз. Меѓу другото, некои демонстранти палеа контејнери за отпад и носеа плакати со натписи како „И ние ќе употребиме насилство“, „На оружје“ или „Оставка на Макрон“.

Француските партии кои се против планот минатата недела поднесоа два предлога за гласање недоверба откако претседателот Емануел Макрон и премиерката Елизабет Борн одлучија да ги искористат своите уставни овластувања планот за реформи да помине без гласање во парламентот.

Француските пратеници вчера ги отфрлија двата предлога за гласање недоверба на владата, што доведе до усвојување на планот за пензиските реформи. Прво се гласаше за иницијатива за гласање недоверба, која ја предложија центристите и левичарите, и таа беше одбиена со само 9 гласови разлика, за недоверба гласаа 278, а за поддршка на владата 287 пратеници. Потоа се гласеше за иницијатива за гласање недоверба која ја преложи крајната десница, но неа ја поддржаа само 94 пратеници.

Во горниот дом на парламентот, Сенатот, владеачките конзервативци имаат мнозинство, и таму реформскиот закон беше усвоен.

Со оглед на тоа дека двете гласања за недоверба пропаднаа, законот се смета за усвоен, но се очекува да биде поднесен до Уставниот совет на Франција пред да стапи на сила. За тоа време, синдикатите за денеска закажаа нов голем протест ширум Франција. Тие бараат целосно повлекување на законот.

Реформата која ја форсира францускиот претседател Макрон, со цел да избегне рецесија поради стареење на популацијата, се состои во подигнување на старосната граница за заминување во пензија, од 62 на 64 години.