Крвав пир на седмоодделенец во училиште во Белград
3 мај 2023
Началникот на полициската управа на Белград Веселин Милиќ соошти дека 14-годишниот напаѓач К.К. кој уби осум ученици и еден чувар во основното училиште „Владислав Рибникар“ и рани повеќе други лица, го планирал злосторството еден месец и дека имал список на деца кои планирал да ги убие.
„Направил план на влезот и излезот во училиштето и одредил, како што навел, приоритетни мерки. Скицата изгледа како од видео-игра, што укажува дека детално планирал како да влезе и во кое одделение“, рече Милиќ на прес-конференција во српската Влада.
Во нападот загинаа осум деца и чуварот на училиштето, а ранети се уште шест ученици и наставничката по историја. Дел од нив се во тешка состојба и лекарите се борат за нивниот живот.
Милиќ рече дека детето не и го соопштил мотивот за злосторството на полицијата, но дека свесно го избрал 3. мај како датум за извршување и училницата за историја, затоа што се наоѓа во близина на влезот во училиштето и затоа што првиот час го имало неговото одделение.
Напаѓачот имал два пиштоли чиј сопственик бил неговиот татко, како и четири молотови коктели, а веднаш по влезот во училиштето ги убил чуварот, дежурната ученичка и две ученички кои случајно биле тука. Потоа ја сменил рамката и отишол во кабинетот по историја, каде пукал врз наставничката и другите деца.
Потоа го напуштил училиштето и од дворот ја повикал дежурната полициска служба на која и соопштил што сторил. Покрај убиецот, уапсен е и неговиот татко, соопшти српската полиција.
Денови на жалост
Српскиот министер за образование Бранко Ружиќ изјави дека Србија станала дел од светот во кој се почесто се случуваат „такви работи“.
„Евидентен е канцерогеното и погубно влијание на интернетот и видео-игрите, ткн. западни вредности. На сите нам ни е јасно дека е потребен голем пресврт и заострување на мерките и системско изнаоѓање решение за оваа трагедија да не прерасне во општествено прифатлив модел на однесување, како што, за жал е случај во некои западни општества“, рече Ружиќ.
Владата на Србија прогласи тридневна жалост на територијата на целата земја со почеток од петок 5 мај до недела 7 мај. Наставата во сите училишта денеска беше откажана, а од четврток ќе почнува со една минута молчење за жртвите на трагедијата.