Најголем дел од животните - цицачи можат да го синтетизираат витаминот Ц, значи сами да го произведуваат. Но, не и луѓето. Ние мораме да го земаме преку храната. Витаминот Ц го има во киви, портокали и грејпфрут, но и во зеленчук како прокељ, брокула и пиперка. За жал, тој е чувствителен на температура, затоа, внимавајте при готвењето!

Витаминот Ц не е важен само за старите луѓе, болните и вегетаријанците. Неговите биохемиски функции во секое тело се исти и подеднакво важни. Витаминот Ц спаѓа во микронутриенти, кои на организмот не му даваат енергија, но сепак се есенцијални за неговите основни функции. Во нив се вбројуваат метаболизмот и нашиот одбранбен систем.

Како антиоксидант, витаминот Ц ги редуцира штетите кои ги предизвикуваат т.н. слободни радикали, штетни молекули кои ја нарушуваат структурата на здравите ткива во организмот. Овие радикали настануваат при нормалните процеси на метаболизам. Но штетни материи, како на пример цигарите, водат до оксидативен стрес и зголемено настанување на слободни радикали, па се зголемува и потребата од витамин Ц

Витаминот Ц од овие јагоди во човечкото тело не се користи само за заштита од слободни радикали, туку тој е важен т.н. кофактор при цела редица ензимски активности, како на пример синтеза на протеинот колаген. Колагенот е дел од тетивите, коските, рскавицата и кожата. Бавно и лошо заздравување на некоја рана од оваа причина може да е знак за недостиг на витамин Ц во организмот.

На телото му е потребен витамин Ц за да може да се одбрани од инфекции. Витаминот Ц не само што е задолжен за заштита на клетките, туку во случај на инфекција преминува и во напад. Тој стимулира преместување на имунолошките клетки, т.н. неутрофили на местото на инфекција, ја поттикнува фагоцитозата - разградување и отстранување на штетните материи и убивање на вирусите.

Поголем недостиг од витамин Ц може да доведе до скорбут. Забавено заздравување на рани, модрици, опаѓање на косата, крварење на непцата и губење на забите, како и болки во зглобовите се симптоми на оваа потенцијално смртна болест. За заштита се доволни веќе 10 милиграми витамин Ц дневно. Доволно витамин Ц во телото значи и помал ризик од висок крвен притисок, срцеви заболувања и мозочни удари.

Според Централата за заштита на потрошувачите, препорачана дневна доза на витамин Ц за мажите е околу 110 милиграми, за жените - 95. Научниците од Државниот универзитет Орегон пак на сите возрасни им препорачуваат 400 мг витамин Ц дневно. Тврдат, тој е безопасен и ако се „предозирате“, ќе се исфрли преку урината. Нема разлика дали го внесувате преку храната или таблети, велат експертите.

Добриот стар лук! За некои, поради вкусот и неговата силна и трајна миризба претставува ужас.Но, секундарните растителни материи одговорни за типичната арома се вистинска благодет за телото. Оној кој јаде лук, го намалува својот крвен притисок и превенира тромбоза. Антиоксидирачкото дејство на лукот ги штити и клетките на телото.

Постојат преку 200 различни видови на мајчина душица или матерка. Најупотребувана е „вистинската матерка“. Рузмариновата киселина, содржана во растението е одговорна за намалување на нивото на холестерин. Освен тоа, мајчината душица е традиционално средство против настинка, а помага и против кашлица и исфрлање шлајм.

На циметот му се припишува забрзувачко дејство врз метаболизмот. Но, постои и еден проблем: Кумарин. Касија-циметот ја содржи оваа природна состојка, која кај чувствителни луѓе може да предизвика оштетувања на црниот дроб, во поголеми количини отколку Цејлонскиот цимет. Но, не е уште доволно научно докажано дали циметот го намалува нивото на шеќерот кај заболените од дијабетес 2.

Оној кој може скапите конци да ги додаде кон својата збирка мирудии, се здобива и со дополнителни здравствени поволности. Студиите го докажаа позитивното дејство на шафранот врз психата и помошта при депресии. Самата миризба на зачинот придонесува за ублажување на предменструалните симптоми. Освен тоа, шафранот влијае и како афродизијак, барем кај машките глувци.

Иако анасонот и ѕвездовидниот анасон (на фотографијата) ботанички не се сродни, содржат етерично масло со сличен состав, одговорно за типичниот мирис на нишадор и морач. Анасонот е познат првенствено по своето дејство против грчеви кај проблемите со органите за варење. На двете сорти анасон им се припишува дејство против воспаленија.

Мислењата во однос на вкусот на ѓумбирот се поделени, но ретко кој може да го побие позитивниот ефект што тој го има кај настинка во почетна фаза. Во кинеската и ајурведа медицината ѓумбирот одамна се користи како средство против воспаленија, на пример кај реума или артроза. Кртолата освен тоа содржи етерични масла кои ги намалуваат болките и антиоксиданси.

Куркумата меѓу другото е составен дел на кари-прашокот. Нему му се припишуваат пет карактеристики поволни за здравјето: го намалува нивото на холестерол, делува антиоксидативно и е добар против воспаленија. Освен тоа, ги кочи заболувањата од рак, а може да ги забави и промените во мозокот предизвикани од старост, како и да го намали ризикот од заболување од Алцхајмер.

Може ли вареното пиво да ја совлада настинката? Генерации германски мајки го тврдат тоа, иако истражувањата не можеа да го потврдат. А до сличен заклучок дојде и третата по големина пиварница во Јапонија, „Сапоро“, утврдувајќи дека се потребни најмалку 20 литри варено пиво за пијалокот да има антивирусно дејство.

Ако видите подуен Германец, кој едвај се движи, не е исклучено нозете да му се завиткани во облоги. Методата потекнува од народната аптека, а дали помага при висока температура? Факт е-потколениците имаат поголема површина отколку челото. Значи, влажните крпи можат да помогнат во побрзо симнување на температурата. Сепак, не користете ладна, туку млака вода и остранете ја облогата по 30 минути.

Ако го носите додека сте во соба, тогаш шалот е само модел детал. Но, ако некој го завитка околу грлото, значи дека нешто не е во ред. Германците носат шал за ублажување на симптпмите кои навестуваат болки, а подоцна и запаление на грлото. Одлуката е исправна, зашто ова шарче ткаенина навистина го штити делот од телото кој обично не е покриен кога сме надвор.

И Германците велат: чувај се од промаја! Бранот студен воздух е опасен за голиот врат и грбот. Посебно ако претходно сте испотени-вкочанетост, главоболка или настинка не ви бегаат. Лекарите тврдат дека тоа е „целосна бесмислица“. Вирологот Ортвин Адамс истакнува-за тоа нема докази. Задржувањето во ладна просторија не води кон грип, ниту изложувањето на вратот на ладен воздух го загрозува здравјето

Солените стапчињаи препечен леб е нешто што го јадат Германците во случај на дијареја или повраќање. Најдобро ако покрај тоа успеете да се напиете и малку Кока кола. Консумирањето на овие „производи“ всушност е добра идеја. Посебно на соленките, поради солта. Но, заборавете ја Кока колата. Кофеинот е добро познат диуретик.

Симптомите кои навестуваат настинка се доволен повод за Германците да ја наполнат кадата со топла вода на која и‘ додаваат сол и камилица. Купката е добро решение, зашто екстрактите на камилица го намалуваат запалението со инхибирање на ензимот COX-2, исто како и стероидите. Вдишување топла пареа го ублажува кашлањето и ги отвора бронхијалните канали. Но, не претерувајте, 20 минути се доволни.

Што ако можеме вирусот да го уништиме во целост? Дали одењето во сауна може да предизвика „лажна температура“ и така да спречи настинка и напад на вируси? Не, вели вирологот Адамас. „Температурата не го уништува вирусот, таа е тука неефикасна“. Слично е и со сауните. Тие не ја подигнуваат телесната температура до степен кој би довел до уништување на вирусот на грип.

Во случај на сува кашлица, Германците прибегнуваат кон чаша топло млеко со мед. Науката е на страната на овој народен лек, посебно поради медот. Американските студии во повеќе наврати потврдија оти умерена доза мед го намалува кашлањето кај децата кои ноќе не можат да спијат поради овој проблем.

Лук. Германците веруваат дека консумирањето свеж лук може да ги убие вирусите. Постои дури и еден вид чај од лук кој им се дава на болните. Пијалокот помага во спречување дехидрација и му помага на организмот да се опорави. Но, нема научни докази оти лукот е поефикасен во лечење настинка отколку на пример ѓумбир или некој чај. Освен тоа, лукот може да предизвика мачнина.

Речиси секоја Германка ќе ви рече: кога маж ќе се разболи, се претвора во плачливо дете. Но, дали е така? Студија на универзитетот Стенфорд, по преглед на 160.000 здравствени картони со податоци за интензитетот на болката вели: жените поинтензивно ја чувствуваат болката, или барем признаваат дека ги боли (на хартија). Значи, јасни докази за тоа кој кука кога е болен-нема.