Електричниот јавен превоз се воведува во обид да се намали загадувањето во Струмица. Со 12 полначи, автобусите дневно ќе минуваат до 200 километри, во две смени, од 6 наутро до 21:30 часот.

Граѓаните имаат главно позитивни оценки, проткаени со сомнежи:

„Јас искрено не верувам да се возам многу со нив, ама нека е што… Нека има повеќе, нека се модернизира овој град малку“, изјави за ДВ еден млад Струмичанец, а негова сограѓанка раскажува:

„Јас живеам на крајот од градот. За да дојдам до другиот крај навистина ми треба некогаш да се качам (во автобус, н.з.) и да одам до некое место. И реално, малку ќе ни се олесни со такси возилата, бидејќи плаќаме скапо.“ 

„Оваа идеја е супер“, нагласува трет струмичанец и продолжува: „Ова е еколошки и е за поздравување. Само се сомневам околу одржувањето. На таква инфраструктура треба услови да се направи и да има одржување.“

Автобусите чинат 7 милиони евра од буџетот на Општина Струмица, а купени се со лизинг. Тие се од јапонската марка „Исузу“, донесени преку Турција.

Драги Поп Стојанов, директор на ЈСП „Струмица-Транспорт“, објаснува:

„Немаше смисла да одиме со превоз кој ќе се крши со загадувањето и кој ќе се крши со европската агенда за нула емисија на CO2 до 2035 година. Ние сме земја-кандидат за влез во Европска Унија, така што брзо ќе ни тропне на врата таа европска програма…“

Од локалното еко-здружение „Планетум“ ја поздравуваат иницијативата.

„Силно ја поздравуваме идејата, акцијата што се презема од страна на локалната самоуправа и што најпосле веќе имаме градски сообраќај со електрични автобуси и приградски, во сите населени места во Општина Струмица“, изјави за ДВ Александар Лазаров, претседател на еколошкото здружение „Планетум“.

Според сегашните услови, струјата ќе се плаќа по пазарни цени. Најголемиот предизвик е постигнување енергетска независност. Тоа е можно со поставување соларни панели во иднина:

„Кога ние ќе го направиме тоа, енергетска независност на нашите автобуси, ќе имаме фиксна цена. Ќе знаеме колку нѐ чинеле тие фотоволтаици, на колкав период треба да ги отплатиме и имаме фиксна цена на електричната енергија. Но, добиваме не електрична енергија од јаглен или од нафта произведена, туку од сонце. Зелена електрична енергија што е во склоп на зелената агенда на Европска Унија“, вели Драги Поп Стојанов.

Првиот месец, возењето ќе биде бесплатно. Цената на билетите ќе биде утврдена допрва.