Тензиите на Корејскиот полуостров продолжуваат да растат. Северна Кореја, според наводи на јужнокорејската војска, лансирала балистичка ракета. Проектилот, од непознат тип, била истрелан во Јапонското Море ( на корејски: Источното море), соопшти јужнокорејскиот генералштаб. Јапонската војска исто така извести за тестот.

Проектилот, според првичните наоди, паднал во морето надвор од ексклузивната економска зона на Јапонија, објави јапонската телевизија. Летот на проектилот траел 74 минути, што е е најдолго време на лет што некогаш го постигнала севернокорејската ракета, јави јапонската телевизија Асахи цитирајќи го Министерство за одбрана на земјата.

Дострелот на ракетата, според јапонското Министерство, изнесувал 1000 километри. Ова беше веќе дванаесетти ракетен тест на Северна Кореја годинава, по незапамтената серија на тестови спроведени во 2022 година. 

Северна Кореја, претходно годинава, за првпат лансираше интерконтинентална балистичка ракета со цврсто гориво. Обидот за лансирање на воен шпионски сателит со помош на нова ракета-носач, пак, беше неуспешен. Резолуциите на ОН ѝ забрануваат на силно изолираната земја да лансира какви било балистички ракети. Во зависност од дизајнот, тие можат да бидат вооружени со нуклеарна боева глава.

Пјонгјанг, на почетокот на неделава, упати индиректна закана до САД дека ќе соборува американски извиднички авиони. Тоа беше реакција на планираното стационирање на американска нуклеарна подморница во Јужна Кореја. Ваквите планови се закануваат да ја приближат ситуацијата на Корејскиот полуостров до „прагот нануклеарен конфликт“, порачаа севернокорејските власти.