Трамп и Бајден: две посети на границата со различни пораки
БЈ | АРД
1 март 2024
Миграцијата како тема игра голема улога на изборите во САД: претседателот Бајден и потенцијалниот противкандидат Трамп ја посетија границата кон Мексико и испратија сосем различни пораки.
Мигранти од Латинска Америка секојдневно се обидуваат долж реката Рио Гранде да најдат начин да влезат до САДФотографија: Maria Alejandra Cardona/REUTERS
Реклама
Вака звучи конфронтација: Во Игл Пас, Тексас, Доналд Трамп воведе нов поим во предизборната реторика „криминалот на Бајден со доселувањето“ (на англиски: Biden Migrant Crime). Подготвеност за компромис пак звучи вака: 500 километри подалеку, во Браунсвил, Џо Бајден подаде рака и рече „ајде да се обидеме заедно" порачувајќи му на Трамп да им каже „на пријателите во Конгресот да гласаат за надпартискиот Закон за заштита на границите!" Притоа се мисли на пакет мерки за обезбедување на границата, кој двете партии заеднички го договорија во Сенатот и кој сега е блокиран од страна на републиканците во Конгресот, веројатно по налог на Трамп. Илјадници мигранти се обидуваат долж Рио Гранде да најдат начин да влезат во САД.
Игл Пас: Поранешниот претседател на САД, Доналд Трамп во посета на границата кон Мексико заедно со гувернерот на Тексас од неговата републиканска партија, Грег АботФотографија: Go Nakamura/REUTERS
Добро познатата реторика на Трамп
При неговата прва посета на границата по повеќе од една година, Бајден и натаму вината ја префрла на опозицијата, но во неговиот настап барем се бараше некакво решение и кооперација во функција на решавање на прашањето. Трамп пак се вртеше околу вообичаените хорор сценарија – дека луѓето кои доаѓаат до границата со САД се од затвори или од лудници и дека се терористи. За илустрација се повика на една трагедија која денививе ги потресе Американците, имено смртта на 22-годишната студентка Лејкен Рајли од Џорџија која веројатно била убиена од еден Венецуелец, кој пред година и половина илегално ја преминал границата кај Ел Пасо. Бајден никогаш не би ја споменал Рајли, вели Трамп, и нејзиниот убиец го нарече „монструм“. „Измамничкиот Бајден“, како што подбивно и стандардно Трамп го нарекува ривалот, го довел „убиецот“ во земјата. Се чини дека математиката на Трамп покажува дека такво заострување на ситуацијата ноци повеќе гласови отколку пристап ориентиран кон изнаоѓање компромисно решение.
Браунсвил: Припадници на пограничната служба го брифираат американскиот претседател Џо Бајден за состојбата на границата кон МексикоФотографија: Kevin Lamarque/REUTERS
Реклама
Нема мнозинство за законот
Демократскиот сенатор Крис Марфи од Конетикат смета дека тоа е фрустрирачки. Тој е еден од авторите на блокираниот закон. Трамп нема интерес да се расчисти ситуацијата на границата, рече Марфи за Си-Ен-Ен. Хаосот политички повеќе му е од корист, вели сенаторот. Па така и натаму не се очекува мнозинство за законот кој треба да обезбеди повеќе средства за заштита на границата, побрза постапка за азил и право на претседателот по потреба целосно да ја затвори границата. Со тоа на Бајден му преостанува само серија од мерките да ги спроведе со декрети. Бројките покажуваат дека постои потреба од дејствување – минатата година повеќе од два милиони лица илегално ја преминале јужната граница кон САД. За време на Трамп беа 800 илјади лица годишно.
Граница САД-Мексико: Бетон наместо челик
Ѕидот на границата со Мексико ќе се гради. Американскиот претседател Доналд Трамп потпиша соодветен декрет. На делови од границата веќе има ограда. Дали сега челикот ќе биде заменет со бетон?
Фотографија: Reuters/J. L. Gonzalez
Трамп има искуство со градење
„На нашата јужна граница ќе изградам голем ѕид. Никој не гради ѕидови подобро од мене и за тој ѕид ќе плати и Мексико.“ Тоа американскиот претседател Доналд Трамп го изјави во текот на кампањата. Досега тој градеше пред сѐ висококатници и хотели. Ѕидот на границата е на прво место на неговиот план од 10 точки во делот на политиката на доселување.
Фотографија: picture-alliance/AP Photo/C. Torres
Крај кој завршува „нигде-никаде“
Границата меѓу САД и Мексико е долга околу 3.200 километри. Од нив со жица се обезбедени околу 1.100 километри. Границата минува низ четири американски и шест мексикански сојузни држави, минува низ пустина и големи градови. Поради лошата пристапност, еден мал дел од границата во Њу Мексико е отворен. На други места пак патролираат службеници за заштити на границата.
Фотографија: Reuters/M. Blake
Несовладлив челичен џин
Бројот на илегални доселеници во САД се проценува на околу 350.000 годишно. Голем дел од нив доаѓаат од Мексико. Дел од доселениците од Мексико се толерираат. Од друга страна, мексиканските семејства не добиваат виза. Доселениците си посакуваат подобар живот, работа и повеќе пари за своите семејства.
Фотографија: picture-alliance/dpa/A. Zepeda
Само мал допир
Семејствата живеат разделени со ограда. Прегратка не е можна. Во најдобар случај низ челичните шипки може да се протне рака. Ако Доналд Трамп го оствари најавеното, тогаш наместо челик овде ќе има бетон. Тогаш и мал допир нема да биде можен.
Фотографија: picture-alliance/ZumaPress/J. West
Од изолација до предрасуди
„Кога Мексико праќа луѓе, тогаш не ги испраќа најдобрите“, рече Трамп во текот на кампањата. „Испраќа луѓе кои прават многу проблеми. Тие носат дрога, злосторства, силувачи. Некои, би рекол, се и добри луѓе.“ Трамп сака да ги протера илегалните доселеници, барем оние кои се со криминално досие. Сепак, и покрај заканите, многу Мексиканци не се откажуваат од своите планови за бегство во САД.
Фотографија: picture-alliance/AP Photo/G. Bull
Пустина, граница и назад
За некои Мексиканци сонот завршува на границата. Тие завршуваат в затвор. Други за илегално минување преку границата плаќаат со својот живот. Медиумите критикуваат дека безбедносните сили пукаат преку границата. Дури во 2015 година за тоа првпат е обвинет припадник на американската погранична служба.
Фотографија: Reuters/D.A. Garcia
Со сачмарка против непожелните гости
Џим Чилтон, американски фармер, во патрола низ својот имот. Неговата фарма на површина од 200.000 квадратни метри на југоистокот од Аризона граничи директно со Мексико. Помеѓу има само бодликава жица. Чилтон се смета себеси лично одговорен за безбедноста и одвреме-навреме посега по сачмарката.
Фотографија: Getty Images/AFP/F.J. Brown
Чуден крај
„Тортиља ѕид“ е потценувачкиот назив на 22,5 километри долгиот дел од границата меѓу Отеј Меса Бордер Кросинг во Сан Диего (Калифорнија) и Пацификот. Оградата завршува во водата. За да се побегне на другата страна е доволно само да се исплива околу оградата.
