САД, според претседателот Доналд Трамп, планираат од денеска изутрина по локално време да започнат со придружба на бродовите во Ормускиот теснец. На својата платформа Трут соушал, тој напиша дека безбедно ќе бидат изнесувани бродовите од Теснецот. Неколку земји кои не се вклучени во војната со Иран побарале таква помош од САД, напиша Трамп.
Тој не изнесе детали за точниот метод на спроведување на операцијата која ја нарече „Проект Слобода“. Во случај на евентуално нејзино попречување, Трамп се закани со решителен одговор.

Американската војска ја поддржува операцијата

Американската војска, според сопствените изјави, ја поддржува најавената операција за обезбедување на трговскиот превоз во Ормускиот теснец. Операцијата се спроведува по наредба на американскиот претседател и треба да им овозможи на трговските бродови слободен премин низ важиот меѓународен трговски коридор, објави на платформата X, Американската Централна команда (Центком), која е надлежна за регионот. 

Иран ги предупредува САД - кршење на примирјето

Иран ги предупреди САД за дејствијата во Ормускиот теснец. Секое мешање на САД во теснецот ќе се смета за кршење на прекинот на огнот, напиша претседателот на парламентарниот комитет за безбедност, Ебрахим Азизи, на мрежата X. Ормускиот теснец и Персискиот Залив, рече тој, нема да бидат контролирани од „заблудените најави на Трамп“. 

Иранската војска пак денеска се закани дека американските сили ќе бидат нападнати доколку влезат во Ормускиот Теснец.

„Предупредуваме дека секоја странска вооружена сила – особено агресивната американска војска – доколку има намера да се приближи или да влезе во Ормускиот Теснец, ќе биде цел и ќе биде нападната“, се вели во соопштението на Централната команда на иранската војска, пренесено од државната телевизија ИРИБ.

„Повеќепати нагласивме дека безбедноста на Ормускиот Теснец е под контрола на вооружените сили на Исламската Република Иран, и во сите околности, секој безбеден премин мора да биде координиран со овие сили“, се истакнува натаму во соопштението

Од почетокот на војната, Иран де факто го затвори овој Теснец, кој е исклучително важен за светската трговија со нафта. Стотици танкери, контејнерски бродови и товарни бродови оттогаш се блокирани во регионот. Според здружението на германски бродосопственици, меѓу нив има и 47 бродови поврзани со Германија.