Американскиот претседател Доналд Трамп го критикуваше завршувањето на тестот на крстосувачка ракета на нуклеарен погон, објавено од неговиот руски колега Владимир Путин, како „нецелисходно“. „Тој требаше да ја заврши војната (во Украина)“, им рече Трамп на новинарите денеска во претседателскиот авион, осврнувајќи се на Путин. „Војната која требаше да трае една недела, сега трае речиси четири години.. Тој треба да го направи тоа, наместо да тестира ракети“, рече Трамп

Неговата изјава следуваше само неколку часа откако Путин го објави завршувањето на тестирањето на новата крстосувачка ракета со нуклеарен погон - Буревестник. „Клучните тестови сега се завршени“, рече Путин во видео снимка од состанокот со воените претставници, објавено од Кремљ во неделата. Покрај тоа, рускиот претседател нареди да се започне со „подготовки на инфраструктурата за стационирање на ова оружје за руските вооружени сили“. Според економскиот претставник на Кремљ, Кирил Дмитриев, Вашингтон веќе е информиран за завршувањето на тестовите.

Крстосувачките ракети од типот Буревестник се напојуваат со атомска енергија. Путин зборуваше за „неограничен дострел“ и „уникатен изум“, кој, освен Русија, „го нема никој друг во светот“.

Соопштението на Кремљ следеше во контекст на застојот во напорите за можен мир во Украина. Претседателот на САД, Доналд Трамп неодамна ја одложи планираната средба со Путин во Будимпешта на неодредено време. Минатиот вторник, американскиот претседател изјави дека не сака „залудна средба“ со шефот на Кремљ. Во саботата, Трамп нагласи дека „нема да си го троши времето“ сè додека не се наѕира договор за прекин на војната во Украина.