Доналд Трамп бара од Врховниот суд да ја суспендира одлуката на апелацискиот суд, според која тој нема заштита од тужби во врска со случајот на упадот во Капитол. Апелацискиот суд на 6 февруари едногласно го отфрли барањето на Трамп тој да не одговара во случајот, поради тоа што обвиненијата биле поврзани со неговите задачи како претседател на државата.

Со вклучувањето на Врховниот суд во случајот сега целата постапка може да се одолговлече до по претседателските избори во ноември. Доколку на изборите победи Трамп, тој би можел самиот да се помилува.

Доналд Трамп се товари за вмешаност во обидот на неговите поддржувачи со упад во Капитол на 6 јануари 2021 година да спречат преземање на власта од страна на  Џо Бајден. Трамп ги отфрла обвиненијата и тврди дека има имунитет. Неговите адвокати аргументираат дека според Уставот, само Конгресот е тој кој може да го повика Трамп на одговорност.