Планираните лични преговори меѓу Доналд Трамп и Владимир Путин за прекин на руската агресорска  војна против Украина  се под сè поголем знак прашалник. Самиот американски претседател изјави дека сака да се сретне со шефот на Кремљ само кога може да се очекуваат резултати. Таквиот самит мора да биде продуктивен,  истакна  Доналд Трамп  во Белата куќа во Вашингтон.

Кога еден новинар го праша што знае за наводната промена на плановите и дали тоа ќе влијае на неговиот став за евентуална испорака на американски крстосувачки ракети „Томахавк“ во Украина, Трамп одговори: „Не сакам залуден состанок“, додавајќи дека не сака да губи време додека не види што ќе се случи. „Сè уште не сме донеле одлука“, продолжи Трамп, ќе видиме што ќе се случи.

Дали мислеше на можна средба меѓу него и Путин или на прашањето за крстосувачките ракети, остана нејасно. Трамп вети дека ќе даде информации за тоа што ќе преземат САД во следните два дена. И го повтори својот став дека фронтовските линии треба да бидат замрзнати за да се стави крај на борбите во Украина.

Телефонски разговор меѓу Рубио и Лавров

Американските медиуми претходно објавија дека состанокот планиран во Будимпешта очигледно нема да се одржи како што е планирано. Тие се повикаа на информации од Белата куќа по телефонскиот разговор меѓу американскиот државен секретар Марко Рубио и неговиот руски колега, Сергеј Лавров. Овој разговор првично бил замислен како дел од подготовките за самитот во Будимпешта. Требало да следи и личен прелиминарен состанок меѓу двајцата министри. Сепак, ова очигледно било откажано - плановите наводно биле одложени.

Во четврток, по телефонскиот разговор со шефот на Кремљ, Трамп изненадувачки објави дека сака да се сретне со Путин во унгарската престолнина за да разговара за војната во Украина. Републиканецот првично не прецизираше датум, но кратко потоа рече дека самитот веројатно ќе се одржи во следните две недели.

Сопирачки сигнали од Кремљ

Што точно се случило оттогаш, е нејасно. Кремљ веќе испрати сопирачки сигнали и најави потреба од разјаснување. „Сè уште останува многу работа што треба да се заврши“, изјави портпаролот на Кремљ, Дмитри Песков, за руската државна новинска агенција Тас во понеделникот (20.10). Министерствата за надворешни работи на двете земји мора да се справат со мноштво отворени прашања.

Песков нагласи и дека позицијата на Русија во конфликтот не се променила. Иако тој не даде појаснување, јасно е дека Русија има аспирации на многу поголема територија од областите што досега ги освои во Украина. На пример, кратко време по почетокот на војната во февруари 2022 година, покрај веќе во 2014 година анектираниот Крим, Москва прогласи уште четири украински региони за свои, иако до денес сè уште само делумно ги контролира. Коментарите на Песков  се однесуваа на забелешката на Трамп дека сегашната линија на фронтот треба да биде замрзната за да започнат мировни преговори.

„Нон-пејпер“ од Москва

Според новинската агенција Ројтерс, Русија ги доставила своите услови за мировен договор со Украина до  Соединетите Американски Држави  во неформално писмо, инсистирајќи на своите претходни максимални барања. Во таканаречениот нон-пејпер, испратен за време на викендот, владата во Москва го повторува своето барање за  контрола врз целиот регион Донбас и за откажување од стационирање на трупи на НАТО во Украина.

Ројтерс наводно го дознал ова во вторникот од двајца претставници на американската влада и лице запознаено со ситуацијата. Москва со тоа го отфрла предлогот на Трамп за замрзнување на фронтовските линии во нивната моментална состојба.

Дискусија за американските крстосувачки ракети

Американските медиуми, повикувајќи се на извори од Белата куќа, објавија во меѓувреме дека телефонскиот разговор на Рубио со Лавров наводно бил продуктивен. Сепак, ниту  Русија ниту Украина не се подготвени да се вклучат во сериозни мировни разговори во конфликтот - ова беше тенорот на Ен-Би-Си Њус на пример. Не е јасно колку конкретни беа плановите на Русија и САД за состанокот кога Трамп го објави тоа по неговиот телефонски разговор со Путин.

Телефонскиот повик се случи само еден ден пред украинскиот претседател  Володимир Зеленски  да ја посети Белата куќа и веројатно влијаеше на  состанокот во Вашингтон.  За време на состанокот со американскиот претседател, Зеленски сакаше да добие негова дозвола да набави  американски крстосувачки ракети „Томахавк". Украина сака да преземе поофанзивна улога во војната и може да ги испали овие оружја длабоко во руската заднина. Но,  Трамп остана нејасен,  не презеде никакви обврски и инсистираше дека двете страни мора да ја завршат војната.