Министерот за европски прашања Орхан Муртезани вели дека по локалните избори, заедно со европските партнери, се работи на воспоставување дијалог и враќање на довербата меѓу Скопје и Софија. Целта е надминување на спорот и деблокирање на евроинтегративниот процес на земјата.

На прес-конференција во Скопје со шведската министерка за европски прашања Јесика Розенкранц, Муртезани одговори на новинарско прашање за можен трет протокол со Бугарија, како креативно решение за надминување на разликите – идеја што претходно ја спомена претседателката Гордана Сиљановска Давкова.

„Во моментов се прават напори за воспоставување дијалог и градење доверба. Без тоа, не може да се зборува за надминување на проблемот“, изјави Муртезани. 

Идејата за трет протокол

Сиљановска Давкова во гостување на ТВ 24 предложи нов протокол како креативно решение:

„Отворете го Договорот за пријателство и добрососедство – таму нема збор за уставни измени. Нека бидат креативни, трет протокол нека усогласат, во кој ќе кажат дека прашањата за историјата, културата и идентитетот не може да бидат услов“, рече претседателката.

Американската амбасадорка Анџела Агелер во интервју за ТВ 21 изјави:

„Сто проценти сум сигурна дека се работи на уставните измени“.

Муртезани потврди дека тоа е преземена обврска. „Секако дека на уставните измени мора да се работи. Без нив нема преговори и нема членство во ЕУ. Но, во моментов не можеме да зборуваме за процесот кога нашите грижи не се адресирани. За тоа е потребен редовен дијалог и враќање на довербата“, вели тој. 

Шведската министерка за европски прашања Јесика Розенкранц порача дека сега е моментумот за проширување на ЕУ, додека постои нова енергија меѓу земјите-членки.

„Ја охрабрувам Северна Македонија да ги забрза реформите, особено во владеење на правото и антикорупција, за да го искористи овој историски момент“, вели таа.

Мицкоски: Иднината е во ЕУ

Премиерот Христијан Мицкоски, деновиве одговарајќи на пратеничко прашање за извештајот на Европската комисија, нагласи дека иднината на Македонија е во рамките на ЕУ.

„За тоа треба да ги започнеме и завршиме преговорите. Ќе сториме сè за да ја реализираме таа стратешка цел, но мора да биде без двојни стандарди и согласно Копенхашките критериуми“, дециден е премиерот.