Најмладиот милионер кој остварил најголема добивка во денари во Македонија минатата година има само девет години. Тој „заработил“ еден милион денари од закупнина, додека највозрасниот милионер има 97 години и лани остварил доход од 1,2 милиони денари од пензија и доход од извршена работа.

Дваесет и четиригодишно момче, пак, се најде на овогодишната листа на милионери во евра. Тој пријавил доход од странство во износ 61,6 милиони денари, додека 77-годишно лице остварило 92,9 милиони денари доход, главно од дивиденти од компании во земјата.

Највисока плата 

Скопјани убедливо водат по заработката и во земјата и со странски клиенти. Најновите податоци на УЈП покажуваат дека жител на Скопје лани заработил 446 милиони денари годишен бруто доход. 

Директорката на Управата за јавни приходи (УЈП) Сања Лукаревска на прес-конференција информираше дека најголема месечна бруто плата во 2022 година е исплатена во дејност трговија на големо со тутун и изнесувала 195.000 евра.

Највисокото лично примање по основ на извршена работа го пријавил граѓанин од Скопје и изнесува 280 милиони денари на годишно ниво, а доходот е остварен во странство. На врвот на листата за исплата на највисок доход од самостојно вршење дејност повторно се скопјани, а највисокиот износ е 61,9 милиони денари. 

Топ најплатени 

Во десет најдобро рангирани на листата се наоѓаат адвокати, нотари, угостители, одгледувачи на жито и мешункасти растенија и од дејноста производство на амбалажа од хартија. Највисокиот доход од продажба на земјоделски производи е во износ од 18,9 милиони денари, а ја остварил жител на Скопје.

Највисоката капитална добивка минатата година изнесува 173,4 милиони денари, а е остварена и пријавена од граѓанин на Скопје кој продал удел во трговско друштво чија дејност е производство на филмови, видео филмови и телевизиска програма.

Највисоката исплатена дивиденда е во износ од 229,6 милиони денари на граѓанин на Скопје, кој се јавува како сопственик на удел во компанија чија дејност е болници.