Украина им испрати на САД ревидиран план во напорите за прекин на  војната во Украина,  како што објави новинскиот портал РБК Украина. Конкретните детали за контрапредлогот сè уште не се познати.

Според германскиот канцелар Фридрих Мерц, на американскиот претседател Доналд Трамп му се доставени предлози во врска со „територијални отстапки“ од Украина. „Главното прашање тука е какви територијални отстапки е подготвена да направи Украина“, рече Мерц во четврток на прес-конференција со генералниот секретар на НАТО, Марк Руте, во Берлин. „Сепак, ова е прашање на кое првенствено мора да одговорат украинскиот претседател и украинскиот народ“, нагласи Мерц.Оригиналниот план од администрацијата на американскиот претседател  Доналд Трамп беше остро критикуван и од многумина се сметаше за „руска листа на желби“ бидејќи ги  содржеше речиси непроменети клучните барања на Москва.

На пример, Украина не само што требаше да се откаже од членството во НАТО, туку и да ја ограничи големината на својата војска и да се повлече од понатамошни стратешки важни области на исток што моментално ги контролира. За возврат, од Русија се очекуваше да се обврзе да не започнува понатамошни напади врз својот сосед.

Територијалното прашање и безбедносните гаранции за Украина останаа особено чувствителни. Претседателот  Володимир Зеленски  постојано и категорично ги отфрлаше сите  територијални отстапки.  Понатаму, Киев не е подготвен да се потпира само на руските гаранции дека ќе се воздржи од идни воени интервенции. Наместо тоа, украинското раководство бара обврзувачки безбедносни гаранции од САД и европските сојузници.

И рускиот министер за надворешни работи Сергеј Лавров, инсистира на гаранции за неговата земја. „Ние инсистираме на серија договори за траен, одржлив мир со безбедносни гаранции за сите земји учеснички“, изјави тој.

Зеленски ќе одржи уште еден видео состанок овој четврток со претставници на европските држави што ја поддржуваат Украина. Оваа недела може да донесе новости за сите и крај на крвопролевањето, напиша тој на социјалните мрежи.

Кон државите што ја поддржуваат Украина од таканаречената Коалиција на волните, спаѓаат земји-членки на ЕУ како што се Германија и Франција, но и други, како Обединетото Кралство и Норвешка. Повеќе од 30 земји работат заедно со Украина на безбедносни концепти за копно, воздух и море, рече Зеленски во својата вечерна видео порака, најавувајќи дека следат понатамошни билатерални средби. Во исто време, тој ја пофали продуктивната дискусија со американската страна за економската обнова.

Според Трамп, и  САД се поканети на - состанок во Европа овој викенд, на кој се очекува да присуствува Зеленски. Сепак, остана нејасно дали и во каква форма ќе бидат претставени САД. Трамп, германскиот канцелар  Фридрих Мерц,  францускиот претседател  Емануел Макрон  и британскиот премиер Кир Стармер разговараа телефонски во средата за ситуацијата во Украина.

Трамп првично го потврди повикот, а подоцна изјави: „Тие сакаат да дојдеме во Европа на состанок овој викенд, а ние ќе донесеме одлука врз основа на она што ќе ни го презентираат“. Тој не прецизираше на кого мисли. Во врска со телефонскиот разговор со Мерц, Макрон и Стармер, тој рече: „Разговаравме со прилично јасни зборови за Украина“. Додаде дека имало и „некои мали несогласувања околу личности“. Понатаму, тој се пожали на тоа што  во Украина не се одржани избори  и раширената корупција во земјата.

Во заедничка изјава, трите европски држави се согласија дека ова е клучен момент за Украина и безбедноста на евроатлантскиот регион. Работата на мировниот план треба интензивно да продолжи во наредните денови. Според дипломатите на ЕУ, Мерц, Макрон и Стармер треба повторно да се сретнат во Берлин следниот понеделник за понатамошни разговори.