Украинската влада го суспендираше министерот за правда Херман Халушченко поради корупцискиот скандал поврзан со домашната компанија за нуклеарна енергија „Енергоатом“.

Халушченко, кој до летото беше министер за енергетика, е разрешен од должноста, објави денеска (12.11) премиерката Јулија Свириденко на социјалните мрежи. Должностите на Халушченко го презема заменичката министерка за европски интеграции Људмила Сугак.

Скандалот со „Енергоатом“ и притисок за мито

Премиерката Свириденко вчера изјави дека гласот на Халушченко се слуша на снимка од разговор со осомничени лица, објавена од истражна агенција. Според обвинувањата, деловни партнери на „Енергоатом“ биле притискани да платат мито.

Владата веќе го распушти надзорниот одбор на „Енергоатом“.

Корупцијата и енергетската криза

Случајот предизвика големи реакции во Украина и ја стави борбата против корупцијата во центарот на вниманието. Обвинувањата се особено чувствителни, бидејќи населението се соочува со можни прекини на струја оваа зима поради руските напади врз енергетската инфраструктура.

Во текот на летото, обидите на владата да ја ограничи независноста на антикорупциските институции предизвикаа остра критика и надвор од Украина. Борбата против широко распространетата корупција се смета за клучна за украинските аспирации за членство во ЕУ и за обезбедување милијарди евра помош од западните сојузници.