Израел, во преговорите за ослободување на заложниците од Појасот Газа, понудил уште една пауза во борбите од најмалку една недела. Како што објави синоќа (19.12.2023) американскиот информативен портал „Аксиос“, повикувајќи се на две израелски официјални лица и уште еден информиран извор, Израел очекува исламистичкиот Хамас за возврат да ослободи десетици заложници.

Израелскиот претседател Исак Херцог претходно навести дека неговата земја е подготвена да влезе во уште едно примирје во Појасот Газа, со посредство на странски држави.

Херцог како главни причини за прекинот на огнот ги наведе враќањето на заложниците кои ги држи Хамас и потребата поголема помош да стигне до блокираниот Појас Газа. 
„Израел е подготвен за уште една пауза во конфликтот, како и за дополнителна испорака на хуманитарна помош, за да се овозможи ослободување на заложниците“, рече Херцог.
Тој нагласи дека „одговорноста е целосно на лидерот на Хамас, Јахја Синвар, и на остатокот од раководството“.

Се верува дека околу 120 луѓе сè уште се наоѓаат во заложништво на терористичката група Хамас и други палестински милитантни групи кои ја поддржуваат организацијата во Појасот Газа, ставајќи ги израелските власти под сѐ поголем притисок да се постигне договор за нивно ослободување.

Предлогот на Израел за прекин на огнот од најмалку една недела во замена за ослободување на околу 40 заложници бил даден преку посредникот Катар, објави порталот „Аксиос“. Станува збор за преостанатите жени, мажи над 60-годишна возраст и други заложници кои сè уште се држат во Газа, кои се болни или сериозно повредени и на кои им е итна потребна медицинска помош, се вели во извештајот на порталот „Аксиос“