Израелската истрага за убиството на седум хуманитарни работници во воздушен напад неделава во Појасот Газа откри сериозни грешки и прекршување на воената процедура, што доведе до смена на двајца офицери, а високи команданти се службено укорени.

Израелските сили погрешно заклучиле дека ги гаѓаат борците на Хамас кога беспилотно летало удрило во три возила на невладината организација Светска централна кујна, се наведува во извештајот, во кој се додава дека се прекршени стандардните процедури.

Во соопштението се говори за цела низа грешки при одлучувањето: „Нападот врз возилата на хуманитарната асоцијација е сериозна грешка што произлегува од серија пропусти поради погрешна идентификација, грешки во донесувањето одлуки и напад спротивен на Стандардните оперативни процедури (СОП)“, се вели во денешното соопштение на армијата на Израел. Поради гореспоменатите пропусти, сменети се офицери од чиновите полковник и мајор, додека високи офицери службено се укорени, вклучително и генералот кој раководи со Јужната команда.

Истиот ден, во понеделникот вечерта, израелската војска призна дека нејзините сили го извршиле нападот по грешка и се извини за „ненамерната“ смрт на седум лица, меѓу кои има државјани на Велика Британија, Австралија и на Полска, американско-канадски државјанин и палестински државјанин. Нападот наиде на жестока осуда во светот.

Веднаш по соопштението на израелската армија, ВЦК повика на истрага од страна на независна комисија. Невладината организација порача дека израелската војска не може веродостојно да ги истражи сопствените „пропусти“.