Американскиот претседател Џо Бајден вчера изјави дека САД „во наредните денови“ ќе им се придружат на земјите партнери во доставувањето на хуманитарна помош со нејзино исфрлање од авиони над Појасот Газа.

„Во наредните денови ќе им се придружиме на нашите пријатели во операциите за испраќање хуманитарна помош во Газа со авион“, рече Бајден во Белата куќа за време на приемот на италијанската премиерка Џорџа Мелони.

САД, исто така, сакаат да ја истражат можноста за поморски коридор кој би довел големи количества помош за Појасот Газа, рече Бајден. Тој ќе „инсистира“ кај израелската влада да им се дозволи на повеќе хуманитарни конвои да влезат на палестинска територија.

Американскиот претседател нагласи дека помошта која досега е испорачана до Појасот Газа е „далеку од доволна“. „Невини животи се во прашање, животите на деца се во прашање.“

Тој го рече ова еден ден по еден од најсмртоносните инциденти во досегашниот тек на војната во Појасот Газа. Најмалку 115 Палестинци беа убиени, а повеќе од 750 повредени, според Министерството за здравство во Газа под контрола на Хамас, во метежот кој се случи додека трчаа кон камионите со хуманитарна помош, а израелските војници отворија оган врз нив.

Израел соопшти дека многу од загинатите биле прегазени во метежот за време на хаосот кој настанал кога гладните луѓе се упатиле кон камионите со хуманитарна помош и оти некои од израелските војници пукале кон толпата за која верувале дека се движела кон нив на заканувачки начин.

Јордан од ноември, а од пред неколку дена Египет со авион испраќаат помош за Газа. Летовите се координирани со Израел. Храната или лековите им носат одредено олеснување на страдањата, особено во областите, како северниот дел на Појасот Газа, до кои е тешко или невозможно да стигне копнена помош. Сепак, организациите на ОН посочуваат дека количествата кои можат да се испорачаат по воздушен пат се прилично мали. Со оглед на големиот број луѓе кои страдаат во Појасот Газа, ефектот од помошта што се доставува на овој начин е ограничен, велат тие.