Израелската армија вчера го потврди целното убиство на тројцата синови на лидерот на Хамас, Исмаил Ханија.

Тројца оперативци на военото крило на Хамас се „елиминирани“ во воздушен напад во централниот дел на Појасот Газа, соопштија израелските одбранбени сили (ИДФ).

Војската на Израел потврди дека станува збор за синовите на Ханија. Сепак, нема потврда за смртта на неговите внуци во инцидентот.

„ИДФ е запознаен со тврдењата дека се повредени и други роднини на Ханија, меѓу нив и малолетно лице. ИДФ не ја потврдува оваа информација“, се вели во соопштението.

Претходно медиумите на Хамас објавија дека тројцата сина - Хазем, Амир и Мохамед загинале во бомбардирање на возилото со кое патувале во кампот Ал Шати, и оти загинале и четворица внуци на шефот за надворешни работи на исламистичкиот Хамас. 

„Нашите барања се јасни и одредени и нема да правиме отстапки. Непријателот е во заблуда ако мисли дека нападите врз моите синови, за време на екот на преговорите и пред движењето да ги испрати своите одговори, ќе го принудат Хамас да ја промени својата позиција“, изјави Ханија за Ал Џазира.

„Не ми е подрага крвта на моите синови отколку крвта на нашиот народ“, додаде лидерот на Хамас.

Ханија е член на политбирото на Хамас од 2017 година. Според пишувањата на медиумите, тој е исклучително богат и живее луксузен живот во Катар.

Нападот врз се случи на празникот Рамазан Бајрам  кога многу Палестинци во Појасот Газа ги посетија гробовите на нивните роднини кои загинаа за време на шестмесечната војна, која започна по терористичкиот напад на Хамас врз Израел на 7 октомври, минатата година.