Одговорот на Израел на иранскиот напад на 1 октомври се чекаше со недели. Режимот во Техеран тогаш истрела околу 200 балистички проектили врз Тел Авив и други градови.

Денеска, во раните утрински часови на Шабат, следуваше реакција: Израелската армија соопшти дека  со борбени авиони нападнала околу 20 воени цели во Иран.

Операцијата траеше четири часа, објасни армискиот портпарол Даниел Хагари, а нападите беа извршени во три бранови непосредно пред изгрејсонце.

Меѓу целите биле складишта за ракети земја-земја и системи за противвоздушна одбрана. „Иран двапати го нападна Израел, загрозувајќи ги цивилите. Сега ја плати цената“, истакна Хагари, кој го прогласи нападот за завршен.

Според извештаите на медиумите, израелскиот премиер Бенјамин Нетанјаху и министерот за одбрана Јоав Галант претходно во телефонски разговор го одобриле одмаздничкиот напад. За него биле навремено информирани и САД. Според израелската војска не биле нападнати постројки за производство на нафта или нуклеарни постројки.

Портпаролот на војската, Хагари, во исто време, испрати предупредување во случај на дополнителна ескалација: „Се фокусираме на војната во Газа и во Либан. Иран е тој што се обидува да го прошири конфликтот во регионот. Ние при овој напад одбравме само некои моожни цели.  А имаме повеќе цели кои можат да нидат нападнати доколку е потребно.Тоа е јасна порака до оние кои и се закануваат на израелската држава. Тие ќе платат висока цена за тоа“, порача Хагари.

Дали ќе има дополнителна ескалација зависи од Иран. Според тамошната војска, двајца војници загинале во израелскиот напад. „Војниците загинаа при одбраната на земјата“, се вели во соопштението на иранската армија кое го пренесе новинската агенција Тасним. Дополнителни детали, според соопштението, би требло да бидат објавени подоцна. Овие информации во моментов не можат да бидат независно проверени.